اسلام ٹائمز - پاکستان کی بنیادوں کو ہلانے کیلئے ہر طرح سے حملے کیے جا رہے ہیں، رانا مشہود

پاکستان کی بنیادوں کو ہلانے کیلئے ہر طرح سے حملے کیے جا رہے ہیں، رانا مشہود

لاہور میں تقریب سے خطاب کرتے ہوئے چیئرمین وزیرِاعظم یوتھ پروگرام نےکہا کہ دنیا کا ہر مذہب بتاتا ہے کہ مایوسی گناہ ہے، کچھ لوگ پاکستان کو شام اور لبنان جیسا ملک بنانا چاہتے ہیں۔ نواز شریف کے جانے کے بعد جتنی جلدی سے ترقی کرنی چاہیے تھی ویسی ترقی نہیں ہوئی۔

اسلام ٹائمز۔ چیئرمین وزیرِاعظم یوتھ پروگرام رانا مشہود کا کہنا ہے کہ پاکستان کی بنیادوں کو ہلانے کیلئے ہر طرح سے حملے کیے جا رہے ہیں۔ یہاں معاشرے کو تقسیم کرنے کی سازش کی جا رہی ہے، آئی ایم ایف کو 2016ء میں خیرباد کہا گیا مگر اسے دوبارہ مسلط کیا گیا، آئندہ سال کا بجٹ ہم آئی ایم ایف کے بغیر لے کر آئیں گے۔ لاہور میں تقریب سے خطاب کرتے ہوئے چیئرمین وزیرِاعظم یوتھ پروگرام رانا مشہود نے کہا کہ دنیا کا ہر مذہب بتاتا ہے کہ مایوسی گناہ ہے، کچھ لوگ پاکستان کو شام اور لبنان جیسا ملک بنانا چاہتے ہیں۔ نواز شریف کے جانے کے بعد جتنی جلدی سے ترقی کرنی چاہیے تھی ویسی ترقی نہیں ہوئی۔ ان کا مزید کہنا تھا کہ آئی ٹی سیکٹر کو حکومت کی طرف سے جو سپورٹ چاہیے ہوگی ہم کریں گے، ہم آئی ٹی انڈسٹری کو 25 بلین ڈالرز تک پہنچانا چاہتے ہیں، آئی ٹی کی اہمیت کے پیش نظر مفت لیپ ٹاپ دیئے، فری وائی فائی کا پنجاب میں آغاز کیا۔