QR Code

کرنٹ سے بچے کی ہلاکت، والد کا کے الیکٹرک پر 48 لاکھ جرمانہ الخدمت کو عطیہ کرنیکا اعلان

25 Dec 2024 19:23

آٹھ سالہ مرحوم اذہان کے والد نے تمام مظلومین کو پیغام دیا ہے کہ وہ ظلم و ظالم کے خلاف ہتھیار ڈالنے یا گھبرانے کے بجائے آخری حد تک جنگ لڑیں۔

اسلام ٹائمز۔ شہر قائد میں بجلی کے کھمبے سے کرنٹ لگنے سے جان کی بازی ہارنے والے کمسن اذہان کے والدین کو 6 سال بعد انصاف مل گیا، والد نے خوشی کا اظہار کرتے ہوئے ہرجانے میں ملنے والی رقم جماعت اسلامی کے فلاحی ادارے الخدمت کو عطیہ کرنے کا اعلان کرتے ہوئے منفرد روایت قائم کر دی۔ آٹھ سالہ مرحوم اذہان کے والد نے تمام مظلومین کو پیغام دیا ہے کہ وہ ظلم و ظالم کے خلاف ہتھیار ڈالنے یا گھبرانے کے بجائے آخری حد تک جنگ لڑیں۔ تفصیلات کے مطابق کراچی ماڈل کالونی میں 2017ء کی 23 اگست کو تیز بارشوں کے دوران کرنٹ والے پول نے آٹھ سالہ معصوم بچے اذہان کی جان لے لی تھی۔ اذہان کے والد خلیق الدین صدیقی نے کراچی کی مقامی عدالت میں دو کیسز دائر کیے تھے، 2018ء والے کیس میں منگل 24 دسمبر کو 6 سال بعد کمسن بچے کو انصاف مل گیا، عدالت نے کے الیکٹرک حکام کو جرمانے کے طور پر لواحقین کو ہرجانہ ادا کرنے پر پابند کر دیا۔

جج عنبرین جمال کی جانب سے دیئے گئے فیصلے میں کے الیکٹرک کو حکم دیا گیا ہے کہ لواحقین کو 48 لاکھ 19 ہزار روپے کا ہرجانہ ادا کیا جائے۔ اذہان کے والد خلیق الدین صدیقی نے کہا بہت خوش ہوں کہ عدلیہ نے انصاف کیا میں چاہتا ہوں، یہ اعلان مجھے تحریری صورت میں بھی دیا جائے۔ والد خلیق الدین نے کہا کہ دو بیٹیاں اور ایک بیٹا ہے، اذہان دوسرے نمبر پر تھا، پول کی تقریباً 44 کمپلینس کے باوجود کوئی کے الیکٹرک حکام سے نہیں آیا تھا، میرے بچے کی موت کے آدھے گھنٹے میں گاڑی پہنچ گئی اور صحیح کر دیا، کیا کسی کی جان چلی جائے تب ہی کام کیا جائے گا؟کوئی کام کروانے کیلئے کسی کا مرنا ضروری ہے؟ خلیق الدین نے کہا ڈیڑھ سال تک میں اپنے دوسرے بچوں کی دیکھ بھال کرتا رہا، کیونکہ میری بیوی شدید صدمے میں تھی، اذہان ہونہار طالب علم تھا کبھی فیل نہیں ہوا۔

والد نے اذہان کے آخری الفاظ یاد کرتے ہوئے آبدیدہ ہوگئے، والد نے روتے ہوئے کہا اذہان نے آخری مرتبہ میرے دبئی جانے پر کہا "بابا مجھے چھوڑ کر مت جائیں، آپ مجھے سوٹ کیس میں چھپا کر لے جائیں، اگر مجھے پتہ ہوتا کہ شہید ہو جائے گا، میں اس کو اپنے ساتھ ضرور لے جاتا، لیکن میں سمجھ نہیں پایا، یہ میں اب مر کر ہی بھول سکتا ہوں"۔ خلیق الدین صدیقی نے کہا میری اہلیہ کو سب سے زیادہ میری ضرورت تھی، مگر میں اس وقت ساتھ نہیں تھا، ڈیڑھ سال کے ڈپریشن میں مبتلا تھیں، تب میں بچوں کی دیکھ بھال کرتا تھا، جن کے سہارے کی وجہ سے آج زندگی میں جینے کی امنگ ہے۔ اذہان کے بڑے بھائی دانیال صدیقی نے بھی یادیں تازہ کیں اور کہا کہ اذہان کو جانوروں سے بہت محبت تھی، اس لیے خاص عید منانے آئے تھے، ان اگست کی تیز بارشوں کے بعد سے اب کبھی بھی بارش ہوتی ہے والدہ باہر نہیں جانے دیتیں۔

خبر کا کوڈ: 1180447