ریاستی درجہ اور خصوصی اختیارات کی بحالی ہمارا قانونی اور آئینی حق ہے، سریندر چودھری

اسلام ٹائمز۔ جموں و کشمیر کے نائب وزیراعلٰی سریندر چودھری نے کہا کہ اسٹیٹ ہڈ اور خصوصی اختیارات کی بحالی کی خاطر نیشنل کانفرنس میدان عمل میں کود پڑی ہے۔ انہوں نے کہا کہ نیشنل کانفرنس نوکریوں اور زمینوں کے تحفظ کی خاطر کام کر رہی ہے۔ ان باتوں کا اظہار موصوف نے جموں میں نامہ نگاروں سے بات چیت کے دوران کیا۔ انہوں نے کہا کہ جہاں تک جموں و کشمیر سرکار کے پاس اختیارات کا تعلق ہے تو میں یہ واضح کرنا چاہتا ہوں کہ پولیس اور امن و قانون کا مسئلہ مرکزی وزارت داخلہ کے دائرہ اختیار میں ہے۔ انہوں نے کہا کہ یہ کہنا کہ جموں و کشمیر سرکار کے پاس کئی طاقت نہیں غلط ہے، یہاں کے لوگوں نے نیشنل کانفرنس کو منڈیٹ دیا لہذا ہم لوگوں کے مسائل ترجیحی بنیادوں پر حل کرنے کی بھرپور سعی کر رہے ہیں۔

جموں و کشمیر کے وزیراعلٰی عمر عبداللہ کی نئی دہلی میں وزیر داخلہ کے ساتھ ملاقات کے بارے میں پوچھے گئے سوال کے جواب میں نائب وزیر اعلیٰ نے کہا کہ اسٹیٹ ہڈ کی بحالی کے ساتھ ساتھ خصوصی اختیارات کی واپسی کے لئے نیشنل کانفرنس اپنی جدوجہد جاری رکھے گی۔ انہوں نے کہا کہ نیشنل کانفرنس نے الیکشن منشور میں لوگوں سے نوکریوں اور زمینوں کے تحفظ کا وعدہ کیا ہے جس پر ہم چٹان کی طرح قائم ہے۔ بی جے پی کی جانب سے راہل گاندھی پر الزامات عائد کرنے کے بارے میں پوچھے گئے ایک اور سوال کے جواب میں سریندر چودھری نے کہا کہ کانگریس لیڈر ایسا کرنے کے بارے میں سوچ بھی نہیں سکتے۔ انہوں نے کہا کہ بی جے پی ممبران کی جانب سے جو الزامات عائد کئے جارہے ہیں ان میں کوئی صداقت نہیں۔