اسلام ٹائمز - بھارت کا سابق چیف جسٹس عبادت گاہوں کے سروے تنازعہ کا ذمہ دار ہے، محبوبہ مفتی

بھارت کا سابق چیف جسٹس عبادت گاہوں کے سروے تنازعہ کا ذمہ دار ہے، محبوبہ مفتی

پی ڈی پی کی صدر نے کہا کہ اب مذہبی مقامات جیسے اجمیر شریف درگاہ پر سروے کیا جارہا ہے، جو 800 سال سے زیادہ عرصے سے زیارت گاہ رہی ہے۔

اسلام ٹائمز۔ بھارت میں مذہبی مقامات کے سروے کو لے کر تنازع شدت اختیار کرتا جا رہا ہے۔ سپریم کورٹ نے حال ہی میں ایک فیصلہ سنایا ہے جس میں کہا گیا ہے کہ مقامی عدالت کو اس معاملے میں کوئی حکم جاری کرنے سے گریز کرنا چاہیئے۔ مزید برآں عدالت نے سروے رپورٹ پبلک کرنے پر پابندی عائد کر دی ہے۔ ان واقعات کے درمیان جموں و کشمیر کی سابق وزیراعلیٰ محبوبہ مفتی نے جمعہ کو جموں میں ایک بیان دیا، جس میں سابق چیف جسٹس آف انڈیا (سی جے آئی) کو اس تنازع کا ذمہ دار ٹھہرایا ہے۔ محبوبہ مفتی نے جموں میں پارٹی دفتر کے باہر نامہ نگاروں سے بات کرتے ہوئے سابق چیف جسٹس کو اس معاملے کا ذمہ دار ٹھہراتے ہوئے ان پر گیانواپی مسجد کے حوالے سے ایک مشکل فیصلہ کرنے کا الزام لگایا۔ محبوبہ مفتی کے مطابق سابق سی جے آئی نے عبادت گاہوں کے سروے کی اجازت دی۔

انہوں نے نشاندہی کی کہ سپریم کورٹ پہلے ہی 1991ء میں ایک فیصلہ دے چکی ہے، جس میں کہا گیا تھا کہ 1947ء سے عبادت گاہوں کی مذہبی نوعیت کو برقرار رہنا چاہیئے۔ تاہم محبوبہ مفتی نے دعویٰ کیا کہ سی جے آئی کے فیصلے نے اس کی تردید کی، یہ کہتے ہوئے کہ مساجد میں شیو مندر جیسی مذہبی علامتوں کو تلاش کرنے کے لئے سروے کیا جا سکتا ہے۔ انہوں نے یہ بھی بتایا کہ اب مذہبی مقامات جیسے اجمیر شریف درگاہ پر سروے کیا جا رہا ہے، جو 800 سال سے زیادہ عرصے سے زیارت گاہ رہی ہے اور اکثر ہندو بھی یہاں آتے ہیں۔ محبوبہ مفتی نے خدشہ ظاہر کیا کہ اس سے ایسی صورتحال پیدا ہو سکتی ہے جہاں مسلمانوں کے گھروں میں بھی شیو مندر کی تلاشی لی جائے گی۔ انہوں نے خبردار کیا کہ ایسی کارروائیاں ملک کو تباہی اور تقسیم کی طرف لے جا سکتی ہیں، جس سے ہندوستان کے بنیادی اصولوں کو نقصان پہنچ سکتا ہے۔

غور طلب ہے کہ یہ بیان اتر پردیش کے سنبھل میں حالیہ واقعات سے متعلق تنازع کے بارے میں ایکس پر پوسٹ کرنے کے ایک دن بعد آیا ہے۔ محبوبہ مفتی نے اقلیتوں سے تعلق رکھنے والے مذہبی مقامات کی حیثیت کے بارے میں متنازع بحث کو شروع کرنے کے لئے سابق سی جے آئی پر تنقید کی۔ انہوں نے اجمیر شریف جیسے مذہبی مقامات کو نشانہ بنانے کے بارے میں خدشات کا اظہار کیا، جو مزید خونریزی اور فرقہ وارانہ تشدد کا باعث بن سکتا ہے۔ انہوں نے سوال کیا کہ تقسیم کے دور کے تشدد کی یاد دلانے والے اس تقسیم آمیز ماحول کو برقرار رکھنے کی ذمہ داری کون لے گا۔