اسلام ٹائمز - احتجاجی مظاہرین پر ریاستی تشدد آئین و جمہوری اقدار پر حملہ ہے، حافظ نعیم

سیاسی کارکنان قوم کا سرمایہ، انکے خلاف طاقت کا اندھا استعمال ناقابلِ قبول ہے

احتجاجی مظاہرین پر ریاستی تشدد آئین و جمہوری اقدار پر حملہ ہے، حافظ نعیم

چاپلوس حکومت اپنی بقا کیلئے ملک میں جمہوریت کی قبر کھود کر آمرانہ روش کو مضبوط کر رہی ہے

"ایکس" پر اظہار خیال کرتے ہوئے امیر جماعت اسلامی پاکستان کا کہنا تھا کہ ہماری جماعت اپنے دیرینہ مطالبہ پر کھڑی ہے اور چاہتی ہے کہ جوڈیشل کمیشن بنا کر فارم 45 کی بنیاد پر عوام کی اصل منتخب کردہ حکومت لائی جائے، تمام سیاسی قیدیوں کو رہا کیا جائے، 26 ویں آئینی ترمیم کالعدم قرار دی جائے۔

اسلام ٹائمز۔ امیر جماعت اسلامی حافظ نعیم الرحمٰن نے کہا ہے کہ سیاسی کارکنان قوم کا سرمایہ ہوتے ہیں، ان کے خلاف طاقت کا اندھا استعمال ناقابلِ قبول ہے، مظاہرین پر ریاست اور حکومت کی جانب سے تشدد ملک کے آئین اور جمہوری اقدار پر حملہ ہے۔ "ایکس" پر اظہار خیال کرتے ہوئے انھوں نے کہا کہ چاپلوس حکومت اپنی بقا کے لیے ملک میں جمہوریت کی قبر کھود کر آمرانہ روش کو مضبوط کر رہی ہے، یہ درحقیقت ریاست کو کمزور کر رہی ہے۔ انھوں نے کہا کہ ظلم کرنے والے بھول رہے ہیں کہ کل انھیں بھی اس کا سامنا کرنا پڑ سکتا ہے۔ امیر جماعت نے کہا کہ ملک کے آئین اور جمہوری اقدار کے مطابق پرامن احتجاج ہر سیاسی پارٹی اور شہری کا حق ہے، حکومت کو کسی صورت یہ اختیار حاصل نہیں کہ مظاہرین پر چڑھ دوڑے۔

امیر جماعت نے مزید دہرایا کہ ان کی جانب سے بارہا مطالبہ کیا گیا ہے کہ انتخابات میں حقیقی کامیابی حاصل کرنے والوں کو ہی اقتدار ملنا چاہیئے، اگر ہارے ہوئے لوگوں کو مسلط کرنے کی روش جاری رہی تو ملک میں معاشی ترقی اور جمہوریت اور آئین کی بالادستی خواب ہی رہے گا۔ انھوں نے کہا کہ کراچی میئر سے لے کر عام انتخابات تک فارم 47 کی پیداوار نمائندوں کو مسلط کیا گیا اور عوام کے جمہوری حقوق پر ڈاکا مارا گیا۔ امیر جماعت نے کہا کہ موجودہ حکومت فارم 47 کی حکومت ہے، نون لیگ، پیپلزپارٹی اور ایم کیو ایم کو مسلط کیا گیا، تینوں حکمران پارٹیاں عوامی پذیرائی نہیں رکھتیں، سندھ میں پیپلزپارٹی مکمل زوال کا شکار ہے، ایم کیو ایم نے کراچی سے ایک سیٹ تو کیا، ایک پولنگ اسٹیشن سے بھی کامیابی حاصل نہیں کی تھی۔

اسی طرح نون لیگ کا چراغ پنجاب سے بجھ چکا ہے، نواز شریف تک کو ستر ہزار جعلی ووٹوں سے کامیاب کرایا گیا۔ انھوں نے کہا کہ اسٹیبلشمنٹ نے بارہا کرپٹ پارٹیوں اور جاگیرداروں اور وڈیروں کو مسلط کیا اور ناکامی کا سامنا کرنا پڑا۔ انھوں نے کہا کہ جماعت اسلامی اپنے دیرینہ مطالبہ پر کھڑی ہے اور چاہتی ہے کہ جوڈیشل کمیشن بنا کر فارم 45 کی بنیاد پر عوام کی اصل منتخب کردہ حکومت لائی جائے، تمام سیاسی قیدیوں کو رہا کیا جائے، 26 ویں آئینی ترمیم کالعدم قرار دی جائے۔ انھوں نے کہا کہ حکومت آئی ایم ایف کی تابعداری کی بجائے عوام کو بجلی، پٹرول اور اشیائے خورونوش کی قیمتوں میں کمی کرکے ریلیف دے۔ انھوں نے کہا کہ آئی پی پیز معاہدوں سے ہونے والے فائدہ کو بجلی کی قیمتوں میں کمی کے لیے استعمال کیا جائے۔ حافظ نعیم الرحمٰن کا کہنا تھا کہ جماعت اسلامی عوام کے حقوق کے لیے جدوجہد جاری رکھے گی۔