اسلام ٹائمز - پی ٹی آئی کو خفیہ لیڈرشپ یہ سب کنٹرول کر رہی ہے، محسن نقوی

پی ٹی آئی کو خفیہ لیڈرشپ یہ سب کنٹرول کر رہی ہے، محسن نقوی

میڈیا سے گفتگو میں محسن نقوی نے کہا کہ بیرونی حمایت کا الزام نہیں لگانا چاہتا لیکن مظاہرین کی فائرنگ سے ہمارے جوان زخمی ہوئے ہیں جو زیر علاج ہیں، ان کے پاس اسلحہ بھی موجود ہے، اس کی فوٹیج بھی ہے۔

اسلام ٹائمز۔ وفاقی وزیر داخلہ محسن نقوی نے کہا ہے کہ پاکستان تحریک انصاف (پی ٹی آئی) کے احتجاج میں پنجاب سے ایک بھی شخص نہیں آیا، سب لوگ خیبر پختونخوا سے آئے ہیں، ان میں 2 ہزار وہ لوگ بھی شامل ہیں جو تربیت یافتہ ہیں، ان میں سے بہت سے لوگوں کی شناخت کرلی گئی ہے، ان کے بیک گراؤنڈ ہم نے چیک کرا لیے ہیں کہ وہ لوگ کون ہیں، یہ جلد آپ کو بھی پتا چل جائے گا۔ اسلام آباد میں میڈیا سے بات چیت کرتے ہوئے محسن نقوی نے کہا کہ ہم ڈی چوک پر فائرنگ شروع کردیں تو کوئی بندہ نہیں آئے گا لیکن ہم نے ایسا نہیں کرنا، پاک فوج کی تعیناتی ریڈ زون کے تحفظ کے لیے کی گئی، بیلاروس کے سربراہ مملکت اس وقت ریڈ زون میں بیٹھے ہیں۔ انہوں نے کہا کہ ہم نے یہ دعویٰ نہیں کیا تھا کہ مظاہرین اسلام آباد نہیں پہنچ سکیں گے بلکہ انہیں اسلام آباد میں داخلے سے روکنے کے لیے ہر کوشش کرنے کی بات کی تھی۔

ان کا کہنا تھا کہ ہم نے اس کے لیے پی ٹی آئی سے بات چیت بھی کی، اس وقت بیلاروس کا وفد بھی یہاں موجود ہے، ہمارے لیے ریڈ زون کی حفاظت سب سے ضروری ہے۔ محسن نقوی نے کہا کہ پی ٹی آئی والے مذاکرات کرتے ہیں اور فیصلہ بھی کر لیتے ہیں لیکن ایک خفیہ لیڈرشپ یہ سب کنٹرول کر رہی ہے جو پی ٹی آئی میں ہر کسی سے زیادہ طاقتور ہے۔ انہوں نے کہا کہ مظاہرین کے پاس آنسو گیس کے شیلز کی موجودگی ظاہر کرتی ہے کہ خیبر پختونخوا کی حکومت کے سارے وسائل اس احتجاج میں لگ رہے ہیں، ایک شیل کی قیمت 4500 روپے ہے، یہ سب خیبر پختونخوا کی حکومت نے انہیں فراہم کیے ہیں۔ انہوں نے دعویٰ کیا کہ پی ٹی آئی کی قیادت پاکستان کے مفاد کو نقصان نہیں پہنچانا چاہتی لیکن ایک خفیہ طاقت پیچھے بیٹھی ہوئی ہے اور وہی خفیہ ہاتھ پاکستان کو بدنام کرنے کے ایجنڈے پر عمل کر رہا ہے۔

انہون نے کہا کہ اس خفیہ طاقت کا ایجنڈا پاکستان کا ایجنڈا نہیں ہے، وہ خفیہ ہاتھ کامیاب نہیں ہوسکا۔ وزیر داخلہ نے کہا کہ ہم نے پی ٹی آئی سے کہا کہ اس وقت غیر ملکی مہمان یہاں موجود ہیں جو پاکستان کے مہمان ہیں، آپ سیاست کریں اور احتجاج کریں، اس سب میں نقصان صرف پاکستان کا ہوگا لہٰذا ریڈ زون سے دور رہیں، پی ٹی آئی والے اس کے لیے تیار ہیں لیکن فساد کی جڑ ’ خفیہ ہاتھ’ ہے، وہی ایک چیز سب پر بھاری ہے، اس کے ارادے کچھ اور ہیں، مجھے نہیں پتا کہ اس نے کب پی ٹی آئی کو ٹیک اوور کرنا ہے، اسی کی وجہ سے پی ٹی آئی کے ساتھ ہاتھ ہوجائے گا۔ محسن نقوی نے صحافی کے سوال کے جواب میں کہا کہ اس وقت احتجاج پر بیرونی حمایت کا الزام نہیں لگانا چاہتا لیکن مظاہرین کی فائرنگ سے ہمارے جوان زخمی ہوئے ہیں جو زیر علاج ہیں، ان کے پاس اسلحہ بھی موجود ہے، اس کی فوٹیج بھی ہے۔