اسلام ٹائمز - تحریک انصاف کا اسلام آباد جانے کی اجازت نہ ملنے پر لاہور میں احتجاج پر غور

تحریک انصاف کا اسلام آباد جانے کی اجازت نہ ملنے پر لاہور میں احتجاج پر غور

پاکستان تحریک انصاف کے ذرائع نے بتایا کہ پارٹی کارکنوں کو رات 11 بجے راوی روڈ پر بتی چوک میں جمع ہونے کی ہدایت کر دی گئی ہے۔ ارکان اسمبلی، ٹکٹ ہولڈرز اور کارکنان رات 12 بجے کے بعد اسلام آباد کیلئے روانہ ہوں گے۔ قافلے کی قیادت رہنما تحریک انصاف سلمان اکرم راجہ کریں گے۔

اسلام ٹائمز۔ بانی پی ٹی آئی کی کال پر 24 نومبر کو اسلام آباد میں احتجاج کے اعلان کے بعد لاہور کے تمام داخلی و خارجی راستے، موٹرویز اور رنگ روڈ سمیت جی ٹی روڈ کو بھی بند کر دیا گیا ہے۔ اس حوالے سے پاکستان تحریک انصاف کے ذرائع نے بتایا کہ پارٹی کارکنوں کو رات 11 بجے راوی روڈ پر بتی چوک میں جمع ہونے کی ہدایت کر دی گئی ہے۔ ارکان اسمبلی، ٹکٹ ہولڈرز اور کارکنان رات 12 بجے کے بعد اسلام آباد کیلئے روانہ ہوں گے۔ قافلے کی قیادت رہنما تحریک انصاف سلمان اکرم راجہ کریں گے۔

پی ٹی آئی کے ذرائع نے ’’اسلام ٹائمز‘‘ کو بتایا کہ لاہور پولیس نے اگر شہر سے باہر نکلنے کی اجازت نہ دی اور رکاوٹیں نہ ہٹائیں تو وہ لاہور میں احتجاج پر غور کر رہے ہیں۔ اس حوالے سے مختلف واٹس ایپ گروپس میں مشاورتی عمل جاری ہے،جس میں رہنما ایک دوسرے کیساتھ رابطے میں ہیں اور حکمت عملی پر غور کر رہے ہیں۔ دوسری جانب لاہور میں تحریک انصاف کا اجلاس بھی جاری ہے،جس میں حکمت عملی طے کی جا رہی ہے۔ ذرائع کے کہنا ہے کہ اگر اسلام آباد نہ جا سکے تو لاہور میں ہی احتجاجی مظاہرہ کیا جائے گا۔