اسلام ٹائمز - غاصب اسرائیلی فوج کیخلاف حزب اللہ لبنان کا سب سے بڑا ڈرون حملہ

غاصب اسرائیلی فوج کیخلاف حزب اللہ لبنان کا سب سے بڑا ڈرون حملہ

لبنانی مزاحمتی تحریک نے جمعے کی سہ پہر غاصب صیہونی فوج کیخلاف اپنے سب سے بڑے ڈرون حملے کے ذریعے جنوبی لبنان کے علاقے الخیام میں اسرائیلی پیشقدمی کو ناکام بنا دیا ہے

اسلام ٹائمز۔ عرب میڈیا نے اعلان کیا ہے کہ لبنانی مزاحمتی تحریک حزب اللہ نے ملک کے بعض جنوبی علاقوں میں پیشقدمی کی کوشش کرنے والی غاصب صیہونی فوج کے خلاف گزشتہ روز متعدد میزائل و ڈرون آپریشن انجام دیئے ہیں۔

اس بارے اسلامی مزاحمتی محاذ کے قریبی میڈیا الاعلام الحربی نے بھی رپورٹ کیا ہے کہ حزب اللہ لبنان نے غاصب صیہونی فوج کے خلاف روز جمعہ کے آغاز سے لے کر سہ پہر تک جنوبی لبنان کے شہر الخیام میں 8 ڈرون و میزائل حملے کئے ہیں۔ اس رپورٹ کے مطابق حزب اللہ لبنان نے سہ پہر 15:00 بجے، دسیوں خودکش ڈرون طیاروں کے پورے اسکواڈرن کے ساتھ حملہ کرتے ہوئے الخیام شہر میں پیشقدمی پر مبنی غاصب صیہونی فوج کی کوشش کو ناکام بنا دیا۔

اس بارے عرب چینل المنار نے بھی اعلان کیا ہے کہ حزب اللہ لبنان نے الخیام شہر میں غاصب صیہونی فوجیوں کی نقل و حرکت پر وسیع میزائل حملوں کے بعد 28 خودکش ڈرون طیاروں پر مشتمل ایک اسکواڈرن کے ہمراہ اپنے سب سے بڑے ڈرون حملے کے ذریعے شہر الخیام میں غاصب صیہونی فوج کے ٹھکانوں کو تباہ کر دیا ہے۔