اسلام ٹائمز - حق خود ارادیت مسئلہ کشمیر کا واحد حل ہے، غلام محمد صفی

حق خود ارادیت مسئلہ کشمیر کا واحد حل ہے، غلام محمد صفی

ذرائع کے مطابق تحریک نوجوانان کراچی کے ایک نمائندہ وفد نے اسلام آباد میں کل جماعتی حریت کانفرنس کے دفتر کا دورہ کیا۔

اسلام ٹائمز۔ تحریک نوجوانان کراچی کے ایک نمائندہ وفد نے اسلام آباد میں کل جماعتی حریت کانفرنس کے دفتر کا دورہ کیا۔ وفد کا استقبال کل جماعتی حریت کانفرنس کے کنوینر غلام محمد صفی اور جملہ حریت قیادت نے کیا۔ ذرائع کے مطابق وفد میں چیئرمین فیضان حسین، ذیشان، جہانزیب الیاس، سید ارسلان علی، مظہر جاوید شامل تھے۔ اس موقع پر حریت کانفرنس کے کنوینئر غلام محمد صفی نے وفد کو مقبوضہ کشمیر کی تازہ صورتحال اور تحریک آزادی کشمیر کے بارے تفصیلات سے آگاہی دی۔ انہوں نے کہا کہ تحریک آزادی کشمیر کو سیاسی طور پر عالمی سطح پر اجاگر کرنے کیلئے 1993ء میں کل جماعتی حریت کانفرنس کا قیام عمل میں لایا گیا۔ انہوں نے کہا کہ حریت کانفرنس حق خودارادیت کیلئے جدوجہد کر رہی ہے۔ غلام محمد صفی نے کہا کہ بھارت نے کشمیریوں کی آواز کو دبانے کیلئے تحریک آزادی کے قائدین کو مقبوضہ کشمیر اور بھارتی جیلوں میں نظربند کر رکھا ہے۔ حریت کنوینئر نے مزید کہا کہ 1989ء سے اب تک ایک لاکھ سے زائد لوگ شہید کئے گئے جبکہ 1947ء سے 1989ء تک 5 لاکھ لوگ شہید کئے گئے۔ انہوں نے کہا کہ کشمیری عوام پاکستان کو اپنا پشتبان سمجھتے ہیں۔ انہوں نے کہا کہ کشمیری قائداعظم کے فرمان کشمیر پاکستان کی شہہ رگ ہے کو عملی جامہ پہنائیں گے۔

تحریک نوجوانان کراچی کے چیئرمین فیضان حسین نے حریت قیادت کا شکریہ ادا کرتے ہوئے کہا کہ حریت کانفرنس کے دفتر آنے کا مقصد یہ ہے کہ ہم بھی کل جماعتی حریت کانفرنس کا حصہ ہیں اور حریت کے تمام پروگراموں کی مکمل حمایت کرتے ہیں۔ اجلاس میں محمد فاروق رحمانی، محمود احمد ساغر، ایڈووکیٹ پرویزاحمد، محمد شیخ عبدالمتین، میاں مظفر امتیاز وانی، مشتاق احمد بٹ، سید اعجاز رحمانی، نثار مرزا، شیخ محمد یعقوب، زاہد اشرف، زاہد صفی، راجہ خادم حسین، حاجی سلطان بٹ، گلشن احمد، عدیل مشتاق وانی، محمد شفیع ڈار، زاہد مجتبی، شیخ عبدالماجد، امتیاز احمد بٹ، عبد المجید میر عبدالمجید لون اور دیگر نے بھی شرکت کی۔