QR Code

اسلامی جمعیت طلبہ کی یونین الیکشن کے انعقاد کیلئے کے پی میں احتجاجی ریلیاں

23 Nov 2024 00:21

ناظم اسلامی جمعیت طلبہ خیبر پختونخوا وسیم حیدر نے جامعہ ملاکنڈ میں نکالی گئی ریلی سے خطاب کرتے ہوئے کہا کہ حکومت صوبہ بھر کی جامعات میں طلبہ یونین کے الیکشن کا شیڈول جاری کرے۔

اسلام ٹائمز۔ اسلامی جمعیت طلبہ کی جانب سے یونین الیکشن کے انعقاد کیلئے صوبہ بھر میں احتجاجی ریلیاں نکالی گئیں۔ جامعہ پشاور سمیت ملاکنڈ، بینظر بھٹو شرینگل، عبدالولی خان یونیورسٹیز میں طلبہ نے"کنڈکٹ  یونین الیکشنز" سلوگن کے تحت احتجاجی واک اور ریلیاں نکالیں۔ طلبہ نے کتبے اٹھا رکھے تھے۔ جن پر طلبہ یونین کے حق میں نعرے درج تھے۔ ناظم اسلامی جمعیت طلبہ خیبر پختونخوا وسیم حیدر نے جامعہ ملاکنڈ میں نکالی گئی ریلی سے خطاب کرتے ہوئے کہا کہ حکومت صوبہ بھر کی جامعات میں طلبہ یونین کے الیکشن کا شیڈول جاری کرے۔ سپریم کورٹ کا فیصلہ آچکا ہے، اب عملی اقدامات کئے جائیں، طلبہ کے الیکشن کروائے جائیں، اسلامی جمعیت طلبہ، طلبہ حقوق کی جنگ لڑرہی ہے، طلبہ حقوق پر کوئی سمجھوتہ نہیں کریں گے، اس موقع پر ناظم جامعہ ملاکنڈ معاز خان بھی موجود تھے۔

بے نظیر بھٹو یونیورسٹی شرینگل میں صوبائی جنرل سیکرٹری آفتاب حسین نے کنڈکٹ یونین الیکشنز واک سے خطاب کرتے ہوئے کہا کہ طلبہ کمیونٹی اس وقت مسائل کا شکار ہے۔ صوبائی حکومت تعلیمی ایمرجنسی کے نفاذ کا وعدہ پورا کرے۔ وزیراعلیٰ اعلان کے بعد صوبائی حکومت یونین الیکشن انعقاد کے لیے شیڈول جاری کرے۔ اس سلسلے میں 27 نومبر کو طلبہ حقوق کے لیے ڈویژن سطح پر عظیم الشان حقوق طلبہ جرگہ کا انعقاد کیا جائیگا۔ اس موقع پر ناظم شرینگل احتشام الحق، ناظم دیر ڈویژن رشیداللہ اور صوبائی سیکرٹری اطلاعات رومان ایوب بھی موجود تھے۔

جامعہ عبدالولی خان مردان میں "احتجاجی واک" کا انعقاد کیا گیا۔احتجاجی مظاہرہ سے ناظم علاقہ یونیورسٹی کیمپس حماد خان،ناظم اسلامی جمعیت طلبہ جامعہ عبدالولی خان گارڈن کیمپس کامدار حیدر اور ناظم اسلامی جمعیت طلبہ جامعہ عبدالولی خان مین کیمپس  انیس احمد قاضی نے طلبہ سے خطاب کرتے ہوئے  فوری طور پر طلبہ یونین انتخابات کے انعقاد کا مطالبہ کیا۔ پشاور یونیورسٹی میں احتجاجی ریلی سے ناظم کیمپس تقویم الحق، ناظم پشاور یونیورسٹی آفتاب عالم نے خطاب کیا۔

خبر کا کوڈ: 1174203