اسلام ٹائمز - نون لیگ سے ہمارا اتحاد محبت کا نہیں مجبوری کا اور پاکستان کی بقاء کیلئے ہے، گورنر پنجاب

اگر پیپلز پارٹی مائنس ہو جائے تو وزارت عظمیٰ قائم نہیں رہ سکتی

نون لیگ سے ہمارا اتحاد محبت کا نہیں مجبوری کا اور پاکستان کی بقاء کیلئے ہے، گورنر پنجاب

نیشنل ڈیفنس یونیورسٹی اسلام آباد کے زیراہتمام 26 ویں نیشنل سکیورٹی ورکشاپ کے شرکاء سے خطاب کرتے ہوئے گورنر پنجاب کا کہنا تھا کہ ہم صرف چاہتے ہیں کہ چیزیں میرٹ پر ہوں اور بطور اتحادی مشاورت کی جائے، چھ ماہ ہوگئے ہیں، لیکن آج تک وزیراعلیٰ نے فون کیا اور نہ ہی کبھی مشاورت کی۔

اسلام ٹائمز۔ گورنر پنجاب سردار سلیم حیدر خان نے کہا ہے کہ نون لیگ سے ہمارا اتحاد محبت کا نہیں مجبوری کا ہے۔ نیشنل ڈیفنس یونیورسٹی اسلام آباد کے زیراہتمام 26 ویں نیشنل سکیورٹی ورکشاپ کے شرکاء سے خطاب کرتے ہوئے گورنر پنجاب سردار سلیم حیدر خان کا کہنا تھا کہ گورنر ایک آئینی عہدہ ہے، اصولی طور پر وزیراعلیٰ کو گورنر کے پاس آنا ہوتا ہے، مگر اس کے باوجود میں خود وزیراعلیٰ سے ملنے گیا۔ انہوں نے کہا کہ اس بات کو باور کروایا کہ بطور اتحادی میری طرف سے آپ کو کوئی گلہ نہیں ہوگا، ہم صرف چاہتے ہیں کہ چیزیں میرٹ پر ہوں اور بطور اتحادی مشاورت کی جائے، چھ ماہ ہوگئے ہیں، لیکن آج تک وزیراعلیٰ نے فون کیا اور نہ ہی کبھی مشاورت کی۔ سردار سلیم حیدر کا کہنا تھا کہ فون پر کئی بار رابطہ کرنے کی کوشش کی، مگر زیرو رسپانس آیا، ڈیڈ لاک ہوا، میں اب ان کے پاس جانا مناسب نہیں سمجھتا، حکومت کے اتحادی ہونے کے باوجود ہم سے مشاورت نہیں کی جاتی، ہمارا (ن) لیگ سے اتحاد محبت کا نہیں مجبوری کا ہے، پاکستان کی بقاء کے لیے ہے۔

انہوں نے کہا کہ اگر پیپلز پارٹی مائنس ہو جائے تو وزارت عظمیٰ قائم نہیں رہ سکتی، ملک کی خاطر پھر بھی قربانیاں دیں گے، اپنی قیادت کو پنجاب کی صورتحال کے بارے آگاہ کیا ہوا ہے، 26ویں آئینی ترمیم منظور کروانے میں بلاول بھٹو نے کلیدی کردار ادا کیا۔ گورنر پنجاب کا کہنا تھا کہ ماضی میں نون لیگ کے ساتھ حکومت میں اتحاد کا تجربہ تلخ تھا، ہمیں توقع تھی کہ نون لیگ نے ماضی سے سبق سیکھ لیا ہوگا، تحریری معاہدے اور مشاورتی کمیٹیاں تشکیل دینے کے باوجود معاہدوں پر کوئی عمل درآمد نہیں ہوتا۔ انہوں نے بتایا کہ گورنر ہاؤس میں یونیورسٹی کے طلباء کے لیے ورکشاپ کے انعقاد کا پلان زیر غور ہے، یونیورسٹیوں میں تحقیق پر توجہ دینے کی ضرورت ہے، ہمیشہ یہ پروپیگنڈا کیا جاتا رہا کہ پاکستان پیپلز پارٹی نے سندھ میں ڈلیور نہیں کیا، یہ سن کر خوشی ہوئی کہ سندھ کا ہائر ایجوکیشن کمیشن اچھا کام کر رہا ہے، سندھ میں صحت اور تعلیم کا نظام پنجاب سے آگے ہے۔