اسلام ٹائمز - آئیڈیاز 2024ء، کراچی کی کون سی سڑکیں بند ہوں گی؟ ٹریفک پلان جاری

آئیڈیاز 2024ء، کراچی کی کون سی سڑکیں بند ہوں گی؟ ٹریفک پلان جاری

ٹریفک پولیس نے عوام الناس سے اپیل کی ہے کہ وہ زحمت و پریشانی سے بچنے کے لیے قانون نافذ کرنے والے اداروں اور ٹریفک پولیس سے تعاون کریں اور راستوں کی بندش اور استعمال کرنے والے راستوں پر عمل درآمد کو یقینی بنائیں جبکہ شہری اپنی گاڑیاں اور موٹر سائیکلیں کسی بھی سروس روڈ یا مین روڈ پر پارک کرنے سے گریز کریں۔

اسلام ٹائمز۔ شہر قائد میں منعقد ہونے والی دفاعی نمائش آئیڈیاز 2024ء کے پیش نظر ٹریفک پولیس نے متبادل ٹریفک پلان جاری کردیا۔ تفصیلات کے مطابق ٹریفک پولیس نے رواں ماہ 19 نومبر سے 22 نومبر تک ایکسپو سینٹر میں منعقدہ آئیڈیاز 2024ء نمائش کی سیکیورٹی کے حوالے سے ٹریفک پلان کو حتمی شکل دیدی۔ ترجمان ٹریفک پولیس کی جانب سے جاری اعلامیے کے مطابق سیکیورٹی وجوہات کی بنا پر 19 نومبر سے 22 نومبر تک صبح 7 بجے سے شام 7 بجے تک عارضی طور پر بند کیے جانے والے راستوں کی نشاندہی کی ہے جس میں اسٹیڈیم فلائی اوور سے حسن اسکوائر اور حسن اسکوائر فلائی اوور سے نیشنل اسٹیڈیم تک دونوں فلائی اوورز ٹریفک کے لیے بتائے گئے اوقات میں بند ہونگے جبکہ اسی دورانیہ میں اسٹیڈیم روڈ آغا خان اسپتال سے بائیں جانب حسن اسکوائر (سرشاہ سلیمان روڈ) ٹریفک کے لیے بند رہیگا۔

ڈالمیا سے اسٹیڈیم سنگل سے دائیں جانب حسن اسکوائر کی جانب ٹریفک کو جانے اجازت نہیں ہوگی جبکہ یونیورسٹی روڈ نیپا سے آتے ہوئے ایکسپو سینٹر سے بائیں جانب اسٹیڈیم کی جانب جانے والا راستہ ٹریفک کے لیے بند رہیگا۔ ٹریفک پولیس کی جانب سے ہیوی ٹریفک کے متبادل راستوں ، فلٹر اور ڈائیورژن مقامات کی بھی نشاندہی کی گئی ہے جس میں کار ساز شارع فیصل سے تمام ہیوی ، کمرشل اور واٹر ٹینکرز کا داخلہ عارضی طور پر بند جبکہ تمام ہیوی اور کمرشل گاڑیاں ڈرگ روڈ کا راستہ اختیار کریں گی۔ ملینیئم مال سے اسٹیڈیم روڈ پر ہیوی ٹریفک اور کمرشل گاڑیوں کے داخلے پر بھی عارضی پابندی عائد ہوگی اور اس دوران ہیوی و کمرشل گاڑیاں نیپا عسکری فور اور ڈرگ روڈ سے شارع فیصل یا ملینیئم مال سے نیپا چورنگی کا راستہ اختیار کرینگی ، نیپا سے حسن اسکوائر تک ہیوی و کمرشل ٹریفک کو جانے کی اجازت نہیں ہوگی تاہم اس دوران ہیوی ٹریفک و کمرشل گاڑیاں نیپا سے گلشن چورنگی اور وہاں سے سہراب گوٹھ یا نیپا سے ملینیئم مال سے ڈرگ روڈ کا راستہ اختیار کر سکتی ہیں۔

ترجمان کے مطابق نیو ٹاؤن یونیورسٹی روڈ پر اندرون علاقے سے آنے والی ہیوی ٹریفک و کمرشل ٹریفک کو اسٹیڈیم روڈ جانے کی اجازت نہیں دی جائیگی اس دوران ٹریفک کو پیپلز چورنگی اور شہید ملت کی جانب روانہ کیا جائیگا، لیاقت آباد 10 نمبر سے جانب حسن اسکوائر ہیوی و کمرشل ٹریفک کو جانے کی ہرگز اجازت نہیں ہوگی تاہم اس دوران ہیوی و کمرشل گاڑیوں کے ڈرائیورز لیاقت آباد 10 نمبر سے دائیں جانب تین ہٹی کی جانب جا سکیں گے۔ ترجمان ک مطابق سر شاہ سلیمان روڈ حسن اسکوائر سے جانب نیشنل اسٹیڈیم روڈ کی دونوں اطراف کی سڑکیں عام ٹریفک کے لیے بند رہیں گی اس کے علاوہ غریب آباد سے شارع فیصل براستہ حسن اسکوائر یونیورسٹی روڈ نیپا کا راستہ اختیار کیا جا سکتا ہے۔