QR Code

دفاعی نمائش آئیڈیاز 2024ء اہم اقتصادی اور اسٹریٹیجک ایونٹ ثابت ہوتی ہے، کموڈور اعتزاز خالد

16 Nov 2024 20:38

ایکسپو سینٹر میں میڈیا بریفنگ کے دوران ڈائریکٹر میڈیا ڈیپو کموڈور اعتزاز خالد نے کہا کہ یہ نمائش پاکستان کی دفاعی صنعت کو عالمی سطح پر پیش کرنے کا ایک اہم موقع فراہم کرتی ہے، پاکستان کی اسٹریٹیجک پوزیشننگ اور دفاعی صلاحیتوں کو بھی دنیا کے سامنے لایا جاتا ہے۔

اسلام ٹائمز۔ کراچی میں دفاعی نمائش آئیڈیاز کے بارہویں ایڈیشن کی تعارفی تقریب ایکسپو سینٹر میں منعقد کی گئی۔ تقریب کے موقع پر افواج پاکستان کے رائفل ڈرل کی جانب سے پیشہ ورانہ تربیت کا شاندار مظاہرہ پیش کیا گیا۔ دفاعی نمائش کا انعقاد 19 سے 22 نومبر کے درمیان کیا جائے گا اور اس میں دنیا بھر کے مختلف ممالک کے وفود اپنے سامان حرب کے ساتھ شریک ہونگے۔ ملکی سطح پر تیار کردہ دفاعی مصنوعات بھی نمائش میں رکھی جائیں گی۔ ڈائریکٹر میڈیا ڈیپو کموڈور اعتزاز خالد نے آئیڈیاز 2024ء پر میڈیا بریفنگ میں کہا کہ آئیڈیاز 2024ء کی 4 روزہ نمائش میں متعدد سرگرمیاں شامل ہوں گی، جس میں افتتاحی تقریب، دفاعی صنعتوں پر سیمینار اور میٹنگز منعقد کی جائیں گی۔ انہوں نے کہا کہ یہ نمائش پاکستان کی دفاعی صنعت کو عالمی سطح پر پیش کرنے کا ایک اہم موقع فراہم کرتی ہے، پاکستان کی اسٹریٹیجک پوزیشننگ اور دفاعی صلاحیتوں کو بھی دنیا کے سامنے لایا جاتا ہے۔

اعتزاز خالد نے کہا کہ ہر دو سال بعد ہونے والی یہ نمائش پاکستان کے لیے ایک پلیٹ فارم ہے جہاں وہ اپنے مقامی دفاعی مصنوعات کو دنیا کے سامنے پیش کر سکتا ہے جبکہ بین الاقوامی پارٹنرز کے ساتھ تعاون کے مواقع بھی حاصل کرتا ہے۔ اعتزاز خالد کا کہنا تھا کہ آئیڈیاز 2024ء کا سب سے بڑا فائدہ یہ ہے کہ اس سے پاکستان کی دفاعی برآمدات میں اضافہ ہوتا ہے جس سے ملک کی معیشت مزید مستحکم ہوتی ہے، غیر ملکی وفود اور دفاعی ٹیکنالوجی فراہم کرنے والی کمپنیوں کے ساتھ نیٹ ورکنگ اور کاروباری مواقع حاصل ہوتے ہیں۔ انہوں نے مزید کہا کہ یہ نمائش نہ صرف کاروبار کو فروغ دیتی ہے بلکہ ٹیکنالوجی کی منتقلی اور دفاعی مینوفیکچرنگ کو بھی تیز کرتی ہے، اس طرح پاکستان کے لیے ایک اہم اقتصادی اور اسٹریٹیجک ایونٹ ثابت ہوتی ہے۔

خبر کا کوڈ: 1172969