اسلام ٹائمز - کشمیر کی زمینوں، روزگار اور وسائل پر پہلا حق کشمیریوں کا ہے، عمر عبداللہ

کشمیر کی زمینوں، روزگار اور وسائل پر پہلا حق کشمیریوں کا ہے، عمر عبداللہ

وزیراعلی مقبوضہ کشمیر کا اپنے ایک بیان میں کہنا تھا کہ لوگ جمہوری حکومتوں کی قدر کرتے ہیں کیونکہ وہ حکومت اور عوام کے درمیان پل کی حیثیت رکھتی ہیں۔

اسلام ٹائمز۔ بھارت کے غیر قانونی زیر قبضہ جموں و کشمیر کے وزیراعلیٰ عمر عبداللہ نے کہا ہے کہ اگر ہمیں اپنی سرزمین پر عزت کے ساتھ جینے کا حق نہیں ہے تو ہمیں دستیاب بنیادی سہولیات پانی، بجلی وغیرہ کا کوئی معنی و مطلب نہیں ہے۔ ذرائع کے مطابق عمر عبداللہ نے سرینگر میں ایک تقریب سے خطاب میں کہا کہ ان کی حکومت کی پہلی ترجیح لوگوں کے وقار کو بحال کرنا ہے۔ انہوں نے کہا کہ اپنی زمینوں، اپنے روزگار اور اپنے وسائل پر پہلا حق ہمارا ہونا چاہیے۔ عمر عبداللہ نے کہا کہ گزشتہ چھ برسوں سے ہمارے یہاں کوئی جمہوری نظام نہیں تھا، ایک خلا تھا۔ انہوں نے کہا کہ لوگ جمہوری حکومتوں کی قدر کرتے ہیں کیونکہ وہ حکومت اور عوام کے درمیان پل کی حیثیت رکھتی ہیں۔انہوں نے جموں و کشمیر کے ریاستی درجے کی بحالی کے بارے میں امید ظاہر کرتے ہوئے کہا کہ مجھے یقین ہے کہ ہم اپنی ریاست کا درجہ حاصل کر لیں گے۔ انہوں نے جمہوری اداروں کو مضبوط بنانے اور تحفظ کی اہمیت پر زور دیتے ہوئے کہا کہ پریس ،عدلیہ، بار ایسوسی ایشنز، مزدور یونینئز اور دیگر تنظیموں کو مضبوط کرنا ہو گا۔ انہوں نے کہا کہ ہمیں امن اور باہمی احترام کا ماحول پیدا کرنا ہو گا۔