اسلام ٹائمز - کچےکے ڈاکوؤں کیلئے شہریوں کو ہنی ٹریپ کرنے والی مبینہ ملزمہ کراچی سےگرفتار

کچےکے ڈاکوؤں کیلئے شہریوں کو ہنی ٹریپ کرنے والی مبینہ ملزمہ کراچی سےگرفتار

واضح رہے کہ گزشتہ ہفتے بھی سندھ کی ضلع شکارپور کی پولیس نے ڈاکوؤں سے مقابلے کے بعد سکھر کے رہائشی ایک ہی خاندان کے 9 مغویوں کو بازیاب کروالیا تھا جنہیں رشتے کا جھانسہ دے کر اغوا کیا گیا تھا۔

اسلام ٹائمز۔ کراچی میں اینٹی وائلنٹ کرائم سیل (اے وی سی سی) نے شادی کا جھانسہ دے کر شہریوں کو کچے کے ڈاکووں کے سپرد کرنے والی سہولت کار ملزمہ کو گرفتار کرلیا۔ رپورٹ کے مطابق اے وی سی سی حکام کے مطابق ملزمہ شہریوں کو شادی کا جھانسہ دے کر کشمور،کندھ کوٹ، شکارپور اور گھوٹکی بلاتی تھی جہاں ڈکیت مغویوں پر تشدد کرتے اور ویڈیوز بنا کر لواحقین کو بھیج کر تاوان طلب کرتے۔ حکام کے مطابق ملزمہ سے ہنی ٹریپ میں استعمال ہونے والی سم بھی برآمد کی گئی ہے۔ ملزمہ خود کو کچے کے ڈاکووں کے سربراہ بڈیل خان شر کی بیوی بتاتی ہے۔

واضح رہے کہ گزشتہ ہفتے بھی سندھ کی ضلع شکارپور کی پولیس نے ڈاکوؤں سے مقابلے کے بعد سکھر کے رہائشی ایک ہی خاندان کے 9 مغویوں کو بازیاب کروالیا تھا جنہیں رشتے کا جھانسہ دے کر اغوا کیا گیا تھا۔ شکارپور کے کچے کے علاقے میں ڈاکو مغویوں کو دوسرے مقام پر منتقل کررہے تھے کہ پولیس پہنچ گئی، ڈاکوؤں نے 15 روز قبل سکھر کے ایک ہی خاندان کے 2 مرد، دو خواتین اور اور 5 بچوں سمیت 9 افراد کو رشتے کا جھانسہ دے کر اغوا کیا تھا۔