اسلام ٹائمز - آزاد کشمیر میں لیگی حکومت کے قیام سے تعمیر و ترقی کا نیا سفر شروع ہو گا، شاہ غلام قادر

آزاد کشمیر میں لیگی حکومت کے قیام سے تعمیر و ترقی کا نیا سفر شروع ہو گا، شاہ غلام قادر

دورہ نیلم کے دوران مختلف تقریبات سے خطاب کرتے ہوئے پی ایم ایل نواز کےصدر کا کہنا تھا کہ اس ریاست کو ہمارے آبائواجداد نے قربانیاں دیکر حاصل کیا ہے، مطالبات کی مکمل حمایت کرتے ہیں مگر پاکستان مخالف بیانیہ کو کسی طور پر پروان نہیں چڑھنے دینگے۔

اسلام ٹائمز۔ صدر پاکستان مسلم لیگ نواز آزاد جموں و کشمیر شاہ غلام قادر نے دورہ نیلم کے دوران جندرسری، کیل کناری کے مقام پر شمولیتی پروگرامات کے موقع پر منعقدہ تقریبات سے خطاب کرتے ہوئے کہا کہ آزاد کشمیر میں مسلم لیگ نواز حکومت بنائے گی جس کے ذریعے آزاد کشمیر میں تعمیر و ترقی کا نیا سفر شروع ہو گا، نیلم ویلی سمیت آزاد کشمیر میں ترقی کا نیا دور شروع ہونے والا ہے، آنے والا وقت آزاد جموں و کشمیر میں مسلم لیگ نواز کا ہے، آزاد کشمیر بھر میں کارکنان مسلم لیگ نواز کی آمد کی تیاریاں شروع کریں، کسی ایسی سرگرمیوں میں شرکت نہ کریں جو ریاست مخالف ہو یہ ریاست ہمیں کسی نے طشتری میں رکھ کر نہیں دی ہے اس ریاست کو ہمارے آبائواجداد نے قربانیاں دیکر حاصل کیا ہے، مطالبات کی مکمل حمایت کرتے ہیں مگر پاکستان مخالف بیانیہ کو کسی طور پر پروان نہیں چڑھنے دینگے۔ آج آزاد کشمیر میں ایسا گروہ پیدا ہو گیا ہے جو پاکستان کی اور افواج پاکستان کی مخالفت کرتا ہے۔ میں ایل او سی پر کھڑے ہو کر کہتا ہوں کہ وادی نیلم کے لوگ کل بھی پاکستانی تھے آج بھی پاکستانی ہیں، پاکستان سے ہمارا رشتہ کلمہ کی بنیاد پر ہے مفادات کی بنیاد پر نہیں۔ نیلم ویلی کے لوگ افواج پاکستان کے ساتھ شانہ بشانہ کھڑے ہیں اور کھڑے رہیں گے۔

ہمارے آبائواجداد نے اس علاقے کو آزاد کروانے کے لیے قربانیاں دی ہیں ہم ان کو رائیگاں نہیں ہونے دینگے۔ فلسطنین اور غزہ کے حالات کو دیکھ کر دل خون کے آنسوؤں روتا ہے جن پر وحشیانہ بمباری ہو رہی ہے جس کے نتیجے میں چھوٹے بچے، بزرگ، جوان، خواتین شہید ہو رہے ہیں اور املاک کو نقصان پہنچایا جا رہا ہے، ان کی مدد کوئی بھی ملک نہیں کر رہا، ہمیں تو پاکستان اور پاک آرمی پر فخر ہے جو ہر مشکل وقت میں کشمیریوں کے ساتھ چٹان کی طرح کھڑے رہتے ہیں اور بھارت کو آنکھ میں آنکھ ڈال کر اس کا جواب دیتے ہیں۔