QR Code
کوئٹہ، علامہ مقصود ڈومکی و دیگر کی ایرانی قونصل جنرل سے ملاقات
8 Oct 2024 18:07
ملاقات میں علامہ مقصود علی ڈومکی و دیگر علماء نے شہید سید حسن نصر اللہ اور کمانڈر شہید عباس نیل فروشان کی شہادت پر تعزیت کا اظہار کیا۔
اسلام ٹائمز۔ مجلس وحدت مسلمین پاکستان کے مرکزی رہنماء علامہ مقصود علی ڈومکی کی قیادت میں ایک وفد نے اسلامی جمہوریہ ایران کوئٹہ پہنچ کر قونصل جنرل اسلامی جمہوریہ ایران مہدی شائقی سے ملاقات کرکے شہید سید حسن نصر اللہ اور کمانڈر شہید عباس نیل فروشان کی شہادت پر تعزیت کی۔ اس موقع پر جماعت اہل حدیث بلوچستان کے صوبائی امیر مولانا سید عتیق الرحمن، ایم ڈبلیو ایم بلوچستان کے صوبائی جنرل سیکرٹری علامہ سہیل اکبر شیرازی اور جمعیت علمائے پاکستان کے رہنماء سید فیروز شاہ جیلانی و دیگر ان کے ہمراہ تھے۔
اس موقع پر گفتگو کرتے ہوئے علامہ مقصود علی ڈومکی نے کہا کہ حزب اللہ کے بہادر قائد شہید سید حسن نصر اللہ عالم اسلام کے بہادر اور نڈر لیڈر تھے۔ وہ مقاومتی محاذ کے ترجمان اور رہبر مسلمین کے توانا بازو تھے۔ آپ نے اسرائیل غاصب کے خلاف طویل جنگ لڑی اور لبنان کا مقبوضہ علاقہ اسرائیلی افواج سے لڑ کر خالی کروایا۔ آپ اسرائیل اور شیطانی قوتوں کے لئے خوف کی علامت تھے، جبکہ فلسطین اور لبنان کی مظلوم عوام کے لئے امید کی کرن تھے۔ آپ نے جس تحریک کا اغاز کیا وہ اسرائیل کے خاتمے تک جاری رہے گی۔ انہوں نے کہا کہ اسلامی جمہوریہ ایران نے مظلوم فلسطینیوں اور لبنانیوں کی حمایت میں اپنے بہادر کمانڈر شہید عباس نیل فروشان سمیت عظیم لوگوں کی قربانیاں پیش کی ہیں۔ ہم تحریک آزادی فلسطین کے تمام شہداء کو سلام عقیدت پیش کرتے ہیں۔
اس موقع پر گفتگو کرتے ہوئے جماعت اہل حدیث بلوچستان کے صوبائی امیر مولانا سید عتیق الرحمن نے کہا کہ سید حسن نصر اللہ عالم اسلام کے عظیم مجاہد اور اتحاد بین المسلمین کے علمبردار تھے۔ اسلامی جمہوریہ ایران نے غاصب اسرائیل کے خلاف حملہ کرکے مظلوم فلسطینیوں کے خون کا انتقام لیا ہے۔ جس پر ہم اسلامی جمہوریہ ایران کے رہبر اور ملت کو خراج تحسین پیش کرتے ہیں۔ اس موقع پر علامہ مقصود علی ڈومکی، علامہ سہیل اکبر شیرازی اور مولانا سید عتیق الرحمن نے شہید سید حسن نصر اللہ کے لئے تاثرات بک میں اپنے خیالات قلم بند کرتے ہوئے لشکر اسلام کے علمبردار سید مقاومت شہید سید حسن نصر اللہ کو زبردست خراج عقیدت پیش کیا۔
خبر کا کوڈ: 1165202