اسلام ٹائمز - اسرائیل عالمی برادری کی بے بسی سے ناجائز فائدہ اٹھا رہا ہے، امیرِ قطر

اسرائیل عالمی برادری کی بے بسی سے ناجائز فائدہ اٹھا رہا ہے، امیرِ قطر

ACD کے اجلاس سے اپنے ایک خطاب میں شیخ تمیم بن حمد آل ثانی کا کہنا تھا کہ دنیا کو ابھی تک ایک ایسی جنگ کا شدید خطرہ ہے جسے اسرائیل نے غزہ سے شروع کیا ہوا ہے۔

اسلام ٹائمز۔ دوحہ میں "ایشیائی تعاون ڈائیلاگ فورم" (ACD) کا اجلاس ہوا۔ جس سے گفتگو کرتے ہوئے قطر کے امیر "شیخ تمیم بن حمد آل ثانی" نے کہا کہ اس وقت کشیدگی میں کمی، تمام ممالک کی خود مختاری اور صورت حال کو کنٹرول کرنے کی ضرورت ہے۔ انہوں نے کہا کہ جو کچھ غزہ میں ہو رہا ہے وہ ایک نسل کشی ہے۔ انہوں نے مزید کہا کہ اسرائیل، مغربی کنارے میں ناجائز صیہونی کالونیوں کی تعمیر پر عالمی برادری کی بے بسی سے ناجائز فائدہ اٹھا رہا ہے اور لبنان میں اپنے منصوبوں کی تکمیل کے لئے اسے ایک موقع شمار کرتا ہے۔ انہوں نے کہا کہ ہم لبنان میں جارحیت روکنے کے لئے فوری اور سنجیدہ اقدام کا مطالبہ کرتے ہیں۔ شیخ تمیم بن حمد آل ثانی نے یقین دہائی کروائی کہ قطر، فلسطینی عوام کے جائز و قانونی حقوق کے حصول کے لئے اپنی حمایت جاری رکھے گا۔