اسلام ٹائمز - عدالتی نظام تباہ ہو چکا آئینی عدالت کا قیام مجبوری ہے، بلاول بھٹو زرداری

عدالتی نظام تباہ ہو چکا آئینی عدالت کا قیام مجبوری ہے، بلاول بھٹو زرداری

وکلاء سے تقریب میں خطاب کرتے ہوئے چیئرمین پیپلز پارٹی نے کہ جس ذمہ داری کیلئے عدلیہ بیٹھی ہے وہ کام نہیں ہو رہا، اگر ہم چاہتے ہیں کہ شہریوں کو فوری انصاف ملے اور چاہتے ہیں کہ صوبوں کے درمیان فرق نہ رہے تو پھر آئینی عدالت کا قیام ناگزیر ہے۔

اسلام ٹائمز۔ چیئرمین پیپلز پارٹی بلاول بھٹو زرداری نے کہا ہے کہ ہم نے وہ آمرانہ دور دیکھے، جس میں جج صاحبان نے ہی آمر کو اجازت دی کہ وہ آئین میں ترمیم کرلے، ججز دس دس سال تک آئین کو بھول جاتے تھے اور سارا اختیار آمر کو دے دیا جاتا تھا۔ تفصیلات کے مطابق سندھ ہائیکورٹ کے وکلاء سے تقریب میں خطاب کرتے ہوئے بلاول بھٹو نے کہا کہ ہمارا وکلاء سے تعلق تین نسلوں سے ہے، میرا تعلق اس جماعت سے ہے جس نے ملک کو آئین دیا اور ہم تین نسلوں سے آئین سازی کرتے چلے آرہے ہیں، اگر آج پاکستان موجود ہے، طاقتور ہے اور اکٹھا ہے تو 1973ء کے آئین کی وجہ سے ہے۔ انہوں نے کہا کہ ہم نے آمرانہ دور دیکھے، آئین کی دھجیاں بکھیرتے ہوئے بھی دیکھا، ہمارے معزز جج صاحبان کس طرح سے ایک آمر کو یہ کام کرنے دیتے ہیں اور دس دس سال تک آئین کو بھول جاتے ہیں اور سارا اختیار آمر کو دیا جاتا ہے، اس کے بعد مزید آمرانہ دور دیکھا اور شرم ناک بات یہ تھی کہ جج صاحبان نے آمر کو اجازت دی کہ وہ آئین میں ترمیم کرلے۔ بلاول نے کہا کہ اس وقت بھی بے نظیر شہید جج کے سامنے پیش ہوتی تھی اور جج انہیں آئین کا درس دیتے تھے، ہمیں کرپٹ کہا گیا کہ ہم پر آئین اور قانون لاگو نہیں ہوتا، ایک سیاست دان کو ساڑھے گیارہ سال جیل میں رکھا گیا، تاکہ اس نہتی (بے نظیر) کو بلیک میل کیا جا سکے۔

بلاول بھٹو نے کہا کہ ایک بار پی سی او کا حلف ہو جائے تو ہو ٹھیک کہلاتا ہے اور دوسری بار وہی حلف اٹھایا جائے تو جمہوریت اور آئین کو خطرہ لاحق ہو جاتا ہے، ہم نے عوام کیلئے چارٹر آف ڈیمو کریسی کیا۔ انہوں نے کہا کہ ہم عدالت میں اصلاحات لے کر آئیں گے، قانون سازی اور آئین سازی عدالت کے ذریعے نہیں ہوتی آئین سازی کیلئے ہم موجود ہیں، جس ذمہ داری کیلئے عدلیہ بیٹھی ہے وہ کام نہیں ہو رہا، اگر ہم چاہتے ہیں کہ شہریوں کو فوری انصاف ملے اور چاہتے ہیں کہ صوبوں کے درمیان فرق نہ رہے تو پھر آئینی عدالت کا قیام ناگزیر ہے، اس وفاقی عدالت میں تمام صوبوں کے نمائندے ہوں گے اور باری باری ہر صوبے سے چیف جسٹس مقرر کیا جائے گا، سیاسی کسیز کو 90 فیصد وقت دیا جاتا ہے کہ عوامی کیسز کی باری نہیں آتی اس لئے آئین عدالت بنائیں گے جو صرف آئینی معاملات دیکھے گی۔

انہوں ںے کہا کہ کسی جج میں ہمت نہیں کہ وہ سندھ میں آکر اعلان کرے کہ وہ کالا باغ ڈیم بنائے گا، 19ویں آئینی ترمیم عدالت کی دھمکی کی وجہ سے آئی کیوں کہ انصاف دلانے والوں نے 18ویں ترمیم ختم کرنے کی دھمکی دی، پارلیمان کو دھمکی دی گئی کہ آپ کے پورے آئین کو تبدیل کر دیں گے، ہمیں ججز تقرری پر نظرثانی نہ کرنے پر آئین میں ترامیم کی دھمکی دی گئی، آج عدالت اپنی ذمہ داری پوری کرنے میں ناکام ہوگئی ہے، ہمارا عدالتی نظام ٹوٹ چکا ہے مگر ہم عدالتی اصلاحات کے ذریعے عدلیہ کو بحال کریں گے۔ بلاول نے کہا کہ جو ادارے جس کام کیلئے بنیں ہیں وہی کام کریں گے، آئینی عدالت ہی دیکھے گی کہ آئین کے کیا مسائل ہیں، ہم آئینی عدالت اس لئے بنائیں گے، تاکہ کسی اور وزیراعظم کو تختہ دار پر لٹکایا نہ جائے اور عوام کو انصاف ملے۔ انہوں نے کہا کہ جسٹس قاضی فائز عیسی اور جسٹس منصور علی شاہ دونوں کا احترام کرتا ہوں، جج کی عمر کی حد سے متعلق سیاسی جماعتوں کا اتفاق رائے ضروری ہے شاید یہ شرط متنازع ہوجائے، مگر جہاں تک آئینی عدالت کے قیام کا معاملہ ہے اس میں عمر کی حد کی شرط لاگو نہیں کرنی چاہیے، آئینی عدالت کے جج کی عمر کے بجائے مدت طے کی جائے