اسلام ٹائمز - عمران خان جیل کے اندر رہ کر بھی اس وقت ملک کی سیاست پر چھایا ہوا ہے، خواجہ فاروق

عمران خان جیل کے اندر رہ کر بھی اس وقت ملک کی سیاست پر چھایا ہوا ہے، خواجہ فاروق

اپنے ایک بیان میں پی ٹی آئی رہنما کا کہنا تھا کہ موٹر وے، جی ٹی روڈ پر رکاوٹیں لگانے کے باوجود پورا لاہور ہی جلسہ گاہ میں تبدیل ہو گیا تھا، حکومت نے ہر قسم کی پابندی لگائی، جلسہ کا ٹائم ختم ہونے کا عذر لیا لیکن عوام کے جوش و خروش میں کمی نہ آئی۔

اسلام ٹائمز۔ پاکستان تحریک انصاف کے مرکزی رہنما ، اپوزیشن لیڈر خواجہ فاروق احمد نے پی ٹی آئی کے بانی چیئرمین عمران خان کی اپیل پر لاہور میں ہونے والے جلسے کو ایک تاریخ ساز جلسہ قرار دیتے ہوئے کہا کہ پی ٹی آئی کے کارکنوں نے یہ ثبت کر دیا ہے کہ وہ 15 گھنٹے کے مختصر نوٹس پر نئی جگہ جو شہر سے دور تھی پر بھی تاریخی جلسہ کرنے کی صلاحیت و ہمت رکھتے ہیں۔ خواجہ فاروق احمد نے کہا کہ موٹر وے، جی ٹی روڈ پر رکاوٹیں لگانے کے باوجود پورا لاہور ہی جلسہ گاہ میں تبدیل ہو گیا تھا، حکومت نے لائٹس جب بن کی تو عوام نے موبائل کی روشنیوں سے جلسہ کو رشن کیا، حکومت نے ہر قسم کی پابندی لگائی، جلسہ کا ٹائم ختم ہونے کا عذر لیا لیکن عوام کے جوش و خروش میں کمی نہ آئی، پی ٹی آئی کے رکن اسمبلی دیوان غلام محی الدین کو جب دوبارہ پولیس نے ہائیکورٹ سے ضمانت پر رہائی کے بعد گرفتار کرنا چاہا تو کارکنوں نے ایک بڑے جلوس کی صورت میں دیوان غلام محی الدین کو جلسہ گاہ میں لائے اور اس طرح حکومت کی چال کو خاک میں ملا دیا۔ حلہق نمبر 3 سٹی مظفرآباد کے مہتاب اعوان، وسیم اعوان، وقار اعوان اور دیگر کارکنوں کی ایک بڑی تعداد شاہدرہ اور گردونواح سے ریلیوں کی صورت میں جلسہ گاہ میں تمام تر سڑکوں کی بندش کے باوجود پہنچی۔

خواجہ فاروق احمد نے پی ڈی ایم ٹو اور ان کے سرپرستوں سے کہا کہ لاہور کے جلسہ کے بعد اب انہیں سمجھ آ جانی چاہیے کہ وہ جتنی پابندیاں لگائیں، عمران خان جیل کے اندر رہ کر بھی اس وقت ملک کی سیاست پر چھایا ہوا ہے، حکومت کی ان بچگانہ حرکات اور اپنے اقتدار کو بچانے کی غرض سے پورے ملک کی معیشت، سیاست کو تباہ کرنے والے ان ناعاقبت اندیش کرپٹ ٹولے سے جتنی جلدی ملک و ملت کی جان چھوٹ جائے تو پاکستان کے حق میں بہتر ہو گا، عمران خان انشاءاللہ جب باہر آئے گا تو نہ صرف لاہور بلکہ پورا پاکستان ہی ایک بڑے جلسہ میں تبدیل ہو جائے گا، آخر کب تک عمران خان کو جھوٹے، بے بنیاد مقدمات میں یہ بدنیت حکمران بند رکھ سکیں گے۔