اسلام ٹائمز - اسرائیل نے فلسطین میں دہشتگردی کا بازار گرم کر رکھا ہے، صدر آصف علی زرداری

اسرائیل نے فلسطین میں دہشتگردی کا بازار گرم کر رکھا ہے، صدر آصف علی زرداری

اپنے پیغام میں صدر مملکت نے کہا کہ آج دنیا کو مختلف علاقوں میں جغرافیائی سیاسی کشیدگی اور تنازعات کا سامنا ہے، تنازعات عالمی امن کو خطرے میں ڈال رہے ہیں، اسرائیل ہزاروں لوگوں کے غزہ میں قتل عام سے فلسطینیوں کی نسل کشی کر رہا ہے۔

اسلام ٹائمز۔ صدرِ مملکت آصف علی زرداری نے کہا ہے کہ اسرائیل نے فلسطین میں دہشت گردی کا بازار گرم کر رکھا ہے۔ عالمی یوم امن کے موقع پر جاری کیے گئے اپنے پیغام میں آصف علی زرداری نے کہا کہ عالمی یوم امن پر اقوامِ عالم کے مابین امن کے اصولوں کے ساتھ وابستگی کا اعادہ کرتے ہیں۔ انہوں نے کہا کہ آج دنیا کو مختلف علاقوں میں جغرافیائی سیاسی کشیدگی اور تنازعات کا سامنا ہے، تنازعات عالمی امن کو خطرے میں ڈال رہے ہیں۔ آصف علی زرداری کا کہنا ہے کہ اسرائیل ہزاروں لوگوں کے غزہ میں قتل عام سے فلسطینیوں کی نسل کشی کر رہا ہے۔

صدرِ مملکت نے کہا کہ اس سال کے عالمی یوم امن کا موضوع ’امن کے کلچر کو فروغ دینا‘ ہے، ہم سب کو اقوامِ عالم کے مابین امن، رواداری اور بقائے باہمی کا کلچر فروغ دینا ہے۔ ان کا کہنا ہے کہ مودی حکومت مقبوضہ جموں و کشمیر میں سنگین انسانی حقوق کی خلاف ورزیاں کر رہی ہے، بھارت میں مسلمانوں اور دیگر اقلیتوں کو ظلم و ستم کا نشانہ بنا رہی ہے، بھارت مسلمانوں کے بنیادی حقوق سلب کر رہا ہے۔

آصف علی زرداری مزید نے کہا کہ بین الاقوامی قوانین اور انسانی حقوق کی کھلی خلاف ورزیاں عالمی امن کے لیے خطرہ ہیں، ہمیں ناانصافی اور ظلم کے خلاف آواز بلند کرنے کی ضرورت ہے، دنیا کی ترجیح تنازعات کے بجائے انسانیت کو درپیش مسائل کا حل ہونا چاہیے۔ صدرِ مملکت کا یہ بھی کہنا ہے کہ دنیا امن کے بغیر ترقی اور خوشحالی حاصل نہیں کرسکتی، جنگیں اور تنازعات لوگوں کی مشکلات اور مصائب میں اضافہ کرتے ہیں، ہم ایسی دنیا تشکیل دے سکتے ہیں جہاں ہماری آئندہ نسلیں امن اور ہم آہنگی کے ساتھ رہ سکیں۔