QR Code

ممبئی میں مسجد کے ایک حصے کو مسمار کرنے کی کارروائی، علاقہ میں کشیدگی

21 Sep 2024 19:16

ایک شہری عہدیدار نے بتایا کہ بی ایم سی کے جی نارتھ وارڈ نے مسجد کے تجاوزات والے حصے کو ہٹانے کا نوٹس جاری کیا ہے اور کہا کہ اس نوٹس کے مطابق کارروائی کی جائیگی۔

اسلام ٹائمز۔ ممبئی میں آج دھاراوی کی کچی آبادی میں کشیدگی پھیل گئی، جب سینکڑوں رہائشی ایک مسجد کے مبینہ غیر قانونی حصے کو منہدم کرنے کے بی ایم سی کے منصوبے کی مخالفت کرنے کے لئے سڑک پر جمع ہوگئے۔ دوپہر تک مسجد کے ٹرسٹیز نے برہان ممبئی میونسپل کارپوریشن (بی ایم سی) کے عہدیداروں سے بات چیت کی اور تجاوزات والے حصے کو ہٹانے کے لئے چار سے پانچ دن کا وقت مانگا اور حکام نے ان کی درخواست قبول کرلی۔ ایک پولیس اہلکار نے بتایا کہ کسی بھی ناخوشگوار واقعے کو روکنے کے لئے علاقے میں کئی پولیس اہلکار تعینات کئے گئے تھے۔ پولیس کے مطابق جی-نارتھ کے انتظامی وارڈ سے بی ایم سی کے اہلکاروں کی ایک ٹیم صبح 9 بجے کے قریب محبوب سبحانی مسجد کے مبینہ غیر قانونی حصے کو منہدم کرنے کے لئے 90 فٹ روڈ پر پہنچی۔ جلد ہی مقامی لوگ موقع پر جمع ہو گئے اور شہری اہلکاروں کو لین میں داخل ہونے سے روک دیا۔ جہاں مسجد واقع ہے، بعد میں سینکڑوں لوگ بھی دھاراوی پولیس اسٹیشن کے باہر جمع ہوئے اور بی ایم سی کے اقدام کے خلاف احتجاج کرنے کے لئے سڑک پر بیٹھ گئے۔

ایک شہری عہدیدار نے بتایا کہ بی ایم سی کے جی نارتھ وارڈ نے مسجد کے تجاوزات والے حصے کو ہٹانے کا نوٹس جاری کیا ہے اور کہا کہ اس نوٹس کے مطابق کارروائی کی جائے گی۔ انہوں نے کہا کہ بعد میں دھاروی پولیس اسٹیشن کے باہر جمع ہونے والے لوگوں نے نوٹس کے خلاف احتجاج کیا اور اہلکاروں کو انہدام کرنے سے روک دیا۔ شہری حکام اور دھاروی پولیس کے ساتھ ایک مشترکہ میٹنگ میں مسجد کے ٹرسٹیوں نے بی ایم سی سے کہا کہ وہ ڈھانچے کے غیر قانونی حصے کو ہٹانے کے لئے انہیں چار سے پانچ دن کی ڈیڈ لائن دیں۔ انہوں نے کہا کہ ٹرسٹیوں نے بی ایم سی کے ڈپٹی کمشنر اور جی نارتھ ڈویژن کے اسسٹنٹ کمشنر کو ایک تحریری درخواست جمع کرائی جس میں کہا گیا ہے کہ وہ اس مدت کے دوران اپنے طور پر تعمیرات کو ہٹا دیں گے۔ عہدیدار نے بتایا کہ شہری ادارے نے درخواست قبول کر لی ہے۔

اس معاملے میں ٹھاکرے گروپ کے رکن پارلیمان سنجے راوت نے کہا کہ ریاستی وزیر داخلہ کو وہاں کی صورتحال پر توجہ دینی چاہیئے۔ دھاراوی میں تمام جماعتوں کے رہنماؤں نے کمشنر سے ملاقات کی ہے اور کہا کہ ہمیں امن کے ذریعے راستہ تلاش کرنا ہے۔ ممبئی میونسپل ایڈمنسٹریشن، پولس انتظامیہ اور مقامی لیڈر ایم پی ورشا گائیکواڑ کے درمیان بات چیت کے بعد ایم پی ورشا گائیکواڑ نے بتایا کہ میونسپل کارپوریشن نے انہدامی کارروائی کا کام روک دیا ہے۔ انہوں نے مقامی لوگوں سے ممبئی میونسپل کارپوریشن کی گاڑیوں کو جگہ دینے اور پرسکون رہنے اور گھر جانے کی اپیل بھی کی۔ دھاراوی ایک گنجان آبادی والی ایشیاء کا سب سے بڑا مسلم علاقہ سمجھا جاتا ہے۔

خبر کا کوڈ: 1161451