QR Code

عمر عبداللہ کا جموں و کشمیر کی گاندربل سیٹ سے اسمبلی الیکشن لڑنے کا اعلان

25 Aug 2024 15:03

الیکشن کمیشن آف انڈیا (ای سی آئی) نے پہلے ہی جموں و کشمیر میں 3 مرحلوں پر مشتمل اسمبلی انتخابات کے پہلے مرحلے کیلئے نوٹس جاری کر دیا ہے۔

اسلام ٹائمز۔ جموں و کشمیر کے سابق وزیر اعلیٰ اور نیشنل کانفرنس (این سی) کے نائب صدر عمر عبداللہ آئندہ اسمبلی انتخابات گاندربل حلقہ سے لڑیں گے۔ یہ اعلان پارلیمنٹ کے رکن سید روح اللہ مہدی اور این سی کے صوبائی صدر ناصر اسلم وانی نے اتوار کو عمر عبداللہ اور اننت ناگ-راجوری حلقہ سے این سی کے سینیئر لیڈر اور ایم پی میاں الطاف احمد کی موجودگی میں کیا۔ عمر عبداللہ گاندربل ضلع کے نونر گاؤں آئے تھے جہاں ایک سیاسی کارکن صائم مصطفیٰ نے پارٹی میں شمولیت اختیار کی۔ صائم مصطفی نے سرینگر کی سیٹ کے لئے پارلیمنٹ کا الیکشن لڑا تھا جب سید روح اللہ مہدی نے دیگر امیدواروں کے درمیان صائم مصطفٰی کو شکست دی تھی۔

عمر عبداللہ کے اسمبلی انتخابات لڑنے کا فیصلہ کے باعث ان کے پہلے والے بیان کی نفی ہوگئی ہے جس میں انہوں نے کہا تھا کہ وہ اس وقت تک انتخابات میں نہیں کھڑے ہوں گے جب تک جموں و کشمیر یونین کے زیر انتظام علاقہ رہے گا۔ عمر عبداللہ نے 2009ء سے 2015ء تک سابقہ ​​ریاست جموں و کشمیر کے وزیر اعلیٰ کے طور پر خدمات انجام دیں اور ان کی پارٹی کے صدر بھی رہے۔ وہ تین مرتبہ پارلیمنٹ کے رکن رہے ہیں اور گاندربل اور بیرواہ کے اسمبلی حلقوں کی نمائندگی کر چکے ہیں۔ عمر عبد اللہ کو 2002ء کے اسمبلی انتخابات میں گاندربل سے پیپلز ڈیموکریٹک پارٹی کے قاضی محمد افضل سے شکست ہوئی تھی۔

الیکشن کمیشن آف انڈیا (ای سی آئی) نے پہلے ہی جموں و کشمیر میں 3 مرحلوں پر مشتمل اسمبلی انتخابات کے پہلے مرحلے کے لئے نوٹس جاری کر دیا ہے۔ پہلے مرحلے میں وادی میں پھیلے 24 اسمبلی حلقوں اور جموں ڈویژن میں 18 ستمبر کو ووٹ ڈالے جائیں گے۔ دوسرے مرحلے کے لئے ووٹنگ 25 ستمبر اور آخری مرحلے کے لئے یکم اکتوبر کو ووٹنگ ہوگی۔ ووٹوں کی گنتی 4 اکتوبر کو ہوگی اور انتخابی عمل 6 اکتوبر تک مکمل ہوجائے گا۔ جموں و کشمیر میں جون 2018ء سے منتخب حکومت نہیں ہے۔ جب بی جے پی نے محبوبہ مفتی کی قیادت والی پی ڈی پی-بی جے پی مخلوط حکومت سے دستبرداری اختیار کی تھی۔ حکومت تحلیل ہونے کے بعد ریاست میں گورنر راج نافذ کردیا گیا تھا اور اس وقت کے گورنر ستیہ پال ملک نے اسمبلی تحلیل کر دی تھی۔ 5 اگست 2019ء کو آرٹیکل 370 کو منسوخ کر دیا گیا اور جموں و کشمیر کو دو مرکز کے زیر انتظام علاقوں جموں و کشمیر اور لداخ میں تقسیم کر دیا گیا۔

خبر کا کوڈ: 1156075