اسلام ٹائمز - اہل تشیع ملک کی موثر قوت، نظر انداز نہیں کیا جا سکتا، علامہ حافظ ریاض نجفی

اہل تشیع ملک کی موثر قوت، نظر انداز نہیں کیا جا سکتا، علامہ حافظ ریاض نجفی

لاہور میں اجتماع سے خطاب میں وفاق المدارس الشیعہ پاکستان کے سربراہ کا کہنا تھا کہ صرف ایک شیعہ عالم کو اسلامی نظریاتی کونسل کاممبر بنانا ناکافی ہے، 50 فیصد حصہ ملنا چاہئیے، متحدہ مجلس عمل تحریک جعفریہ کی سپورٹ سے دوسری بڑی پارلیمانی قوت بن کر ابھری تھی۔ اسلامی نظریاتی کونسل کو اسلامی رہنے دیا جائے، اسے سنی نظریاتی کونسل نہ بنایا جائے۔

اسلام ٹائمز۔ وفاق المدارس الشیعہ پاکستان کے صدر علامہ حافظ سید ریاض حسین نجفی نے جامع علی مسجد جامعة المننظر ماڈل ٹاؤن میں خطاب کرتے ہوئے کہا کہ اہل تشیع ملک کی بڑی موثر قوت ہیں، انہیں نظرانداز نہیں کیا جا سکتا، مگر افسوس اسلامی نظریاتی کونسل کے 17 ارکان میں سے صرف ایک عالم دین علامہ افتخار حسین نقوی کو ممبر بنایا گیا ہے، جبکہ قانون سازی میں پارلیمنٹ کی معاونت کرنیوالے ادارے کی آدھی نشستیں مکتب اہلبیت شیعہ کو ملنی چاہئیں۔ انہوں نے کہا ہے کہ اسلام کے دومکاتب فکر شیعہ اور سنی ہیں۔ یعنی ایک وہ جو پیغمبر اکرم صلی اللہ علیہ وآلہ وسلم کی رحلت کے بعد خاتم الانبیاءکی تجہیز و تکفین میں مصروف ہوگئے جبکہ دوسرا مکتب وہ ہے جو حکومت بنانے کیلئے اجلاس کر رہا تھا۔ اس لحاظ سے اسلامی نظریاتی کونسل سمیت ملک میں جتنے بھی دینی ادارے ہیں، ان میں 50 فیصد حصہ شیعہ کو ملنا چاہیے۔ مگر افسوس اس پر عمل نہیں کیا جا رہا۔

انہوں نے کہا اسی طرح سے اتحاد تنظیمات مدارس کے پانچ وفاق المدارس ممبر ہیں، ان میں سے ایک اہل تشیع کا ہے۔ اس کو بھی دیکھا جائے تو پانچواں حصہ شیعہ کا بنتا ہے۔ حکمرانوں سے ہماری گزارش ہے کہ وہ اہل تشیع کے حقوق کوغصب نہ کریں، ہم اپنے موقف سے کبھی پیچھے نہیں ہٹیں گے۔ اتحاد امت کے فورم کو بھی اگر دیکھا جائے تو ملک میں جب متحدہ مجلس عمل بنی تھی تو تحریک جعفریہ اس کا حصہ تھی تو ایم ایم اے دوسری بڑی پارلیمانی قوت بن کر ابھری تھی۔ پھر جب ایم ایم اے ختم ہوئی تو اس کے بعد مذہبی جماعتوں کو صرف پانچ سے چھ نشستیں ملیں تھیں۔ اس لیے اہل تشیع کو اگر ساتھ رکھیں گے تو یہ آپ کی قوت رہے گی، ورنہ دعوووں کے سوائے آپ کے پاس کچھ نہیں رہے گا۔ انہوں نے مطالبہ کیا ہے کہ اسلامی نظریاتی کونسل کو اسلامی رہنے دیا جائے، اسے سنی نظریاتی کونسل نہ بنایا جائے۔