اسلام ٹائمز - بھارتی حکومت کو کشمیری عوام پر اعتماد نہیں ہے، وحید الرحمن پرہ

بھارتی حکومت کو کشمیری عوام پر اعتماد نہیں ہے، وحید الرحمن پرہ

پیپلز ڈیموکریٹک پارٹی کے یوتھ صدر نے کہا کہ مودی حکومت طاقت اور خوف کے بل بوتے پر جموں و کشمیر میں امن قائم کرنے کی کوشش کر رہی ہے جو نہ تو قابل قبول ہے اور نہ ہی پائیدار۔

اسلام ٹائمز۔ جموں و کشمیر پیپلز ڈیموکریٹک پارٹی کے یوتھ صدر وحید الرحمن پرہ نے پی ڈی پی ضلع دفتر پلوامہ میں پارٹی کارکنوں سے خطاب کرتے پارٹی کارکنان سے اسمبلی انتخابات کے لئے تیار رہنے کی اپیل کی۔ انہوں نے پارٹی کو زمینی سطح پر مضبوط کرنے کی بھی کارکنان سے تلقین کی تاکہ پارٹی کو آنے والے اسمبلی انتخابات میں بھاری اکثریت حاصل ہو۔ جموں کشمیر میں پارلیمانی انتخابات پُرامن طور اختتام پزیر ہونے کے بعد اب یہاں کی سیاسی جماعتیں اسمبلی انتخابات کی تیاریوں میں مصروف ہیں اور مختلف مقامات پر کارکنوں کے ساتھ میٹنگیں منعقد کر رہی ہیں جبکہ ایک جماعت کا دوسری سیاسی جماعت پر تنقید و تشنیع کا سلسلہ بھی جاری ہے، وہیں ایک پارٹی چھوڑ کر دوسری پارٹی میں شامل ہونے کی روایت بھی جاری ہے۔

پارٹی کنونشن کے بعد وحید الرحمن پرہ نے کہا کہ پی ڈی پی نے جموں و کشمیر کے لوگوں کو آواز دی ہے کیونکہ لوگ خوف اور پریشانی کے ماحول میں رہ رہے تھے۔ انہوں نے دعویٰ کیا کہ پی ڈی پی، جموں و کشمیر کے لوگوں کی فلاح و بہبود کے لئے کام کرنے کے لئے وجود میں آئی ہے۔ انہوں نے لیفٹیننٹ گورنر کو مزید اختیارات دینے پر مرکزی سرکار کی سخت سرزنش کرتے ہوئے کہا کہ جموں و کشمیر کے لئے احکامات اور قوانین میں ترمیم اس بات کی عکاسی کرتی ہے کہ مودی حکومت کو جموں و کشمیر کے لوگوں پر اعتماد نہیں ہے۔ انہوں نے کہا کہ یہ ترامیم جموں و کشمیر کی سیاسی جماعتوں اور عوام کو بے اختیار کرنے کے لیے کی جا رہی ہیں۔ وحید الرحمن پرہ نے کہا کہ مودی حکومت طاقت اور خوف کے بل بوتے پر جموں و کشمیر میں امن قائم کرنے کی کوشش کر رہی ہے جو نہ تو قابل قبول ہے اور نہ ہی پائیدار۔