QR Code

کابینہ کمیٹی برائے لاء اینڈ آرڈر کا دورہ ملتان، کمشنر ملتان نے انتظامات پر بریفنگ دی 

10 Jul 2024 22:29

کمشنر ملتان نے بریفنگ میں بتایا کہ ملتان ڈویژن میں تمام 910 جلوس اور 3182 مجالس کے سکیورٹی انتظامات مکمل ہیں، 86 علما و ذاکرین کی ضلع بندی اور 64 کی زباں بندی کے احکامات جاری کیے ہیں۔ خواتین کے تحفظ کیلئے خصوصی طور پر لیڈی پولیس اہلکار تعینات ہیں۔ ملتان میں 128 افراد کو فورتھ شیڈول میں شامل کیا گیا۔ 

اسلام ٹائمز۔ کابینہ کمیٹی برائے لا اینڈ آرڈر ملتان پہنچ گئی، صوبائی وزیر و چیرمین کابینہ کمیٹی خواجہ سلمان رفیق نے سرکٹ ہاوس ملتان میں اس حوالے سے اجلاس کی صدارت کی۔ کابینہ کمیٹی برائے لا اینڈ آرڈر نے ملتان میں مرکزی جلوس کے روٹ اور امام بارگاہوں کا دورہ بھی کیا۔ مولانا حنیف جالندھری نے کابینہ کمیٹی کو کنٹرول روم کا دورہ کروایا۔ کابینہ کمیٹی نے حکومت پنجاب کی جانب سے لگائی گئی پانی کی سبیل کا معائنہ کیا۔ جلوس کے روٹ اور امام بارگاہوں کے باہر تعینات پولیس، سول ڈیفنس، ریسکیو 1122 کے اہلکاروں کی حوصلہ افزائی کی گئی، کابینہ کمیٹی نے ملتان میں محرم الحرام کے جلوس اور مجالس کے انتظامات کا جائزہ لیا۔ صوبائی وزیر خزانہ مجتبی شجاع الرحمن، وزیر ٹرانسپورٹ بلال اکبر خان، وزیر زراعت سید عاشق حسین کرمانی، آئی جی پنجاب ڈاکٹر عثمان انور، سپیشل سیکرٹری داخلہ فضل الرحمان، ایڈیشنل آئی جی سپیشل برانچ ذوالفقار حمید، ایڈیشنل آئی جی ساوتھ پنجاب محمد کامران خان اور ایڈیشنل آئی جی سی ٹی ڈی وسیم سیال بھی اس موقع پر موجود تھے۔ کمشنر ملتان مریم خان اور آر پی او کیپٹن سہیل چوہدری نے انتظامات بارے بریفننگ دی۔

 ملتان ڈویژن میں تمام 910 جلوس اور 3182 مجالس کے سکیورٹی انتظامات مکمل ہیں، 86 علما و ذاکرین کی ضلع بندی اور 64 کی زباں بندی کے احکامات جاری کیے ہیں۔ خواتین کے تحفظ کیلئے خصوصی طور پر لیڈی پولیس اہلکار تعینات ہیں۔ ملتان میں 128 افراد کو فورتھ شیڈول میں شامل کیا گیا۔ اس موقع پر صوبائی وزیر صحت و چیئرمین کابینہ کمیٹی برائے لا اینڈ آرڈر خواجہ سلمان رفیق نے کہا کہ فیلڈ میں جاکر خود دیکھا کہ سکیورٹی و دیگر انتظامات پر بھرپور توجہ دی جا رہی ہے۔ محرم الحرام کو پرامن بنانے کیلئے ہم سب کو اپنا کردار ادا کرنا ہے۔ انہوں نے مزید کہا کہ عاشورہ کے بعد بھی چین سے نہیں بیٹھے بلکہ سکیورٹی صورتحال پر یہی فوکس رہے۔ جلوس کے راستوں میں سرکاری سبیلیں بھی لگائی جا رہی ہیں۔ پنجاب بھر سے رپورٹس محکمہ داخلہ کے مرکزی کنٹرول روم میں دیکھ رہے ہیں۔ تمام ڈویژنل ڈپٹی کمشنرز اور ڈی پی اوز نے بھی بریفنگ میں شرکت کی۔
 

خبر کا کوڈ: 1146991