اسلام ٹائمز - اسکولوں میں بچوں کے منشیات کے ٹیسٹ کی منظوری لے لی، شرجیل میمن

اسکولوں میں بچوں کے منشیات کے ٹیسٹ کی منظوری لے لی، شرجیل میمن

پریس کانفرنس میں وزیرِ اطلاعات سندھ نے کہا کہ تمام صوبوں کو مل کر منشیات کے خلاف کارروائیاں کرنا ہوں گی، اے این ایف نے منشیات فروش قربان علی شاہ کو گرفتار کیا، منشیات کی رقم اس کے ذاتی اکاؤنٹس میں جمع ہوتی تھی، گرفتار منشیات فروش ضمانت پر ہے اس سے ہم نے کافی شواہد حاصل کیے۔

اسلام ٹائمز۔ وزیرِ اطلاعات سندھ شرجیل میمن کا کہنا ہے کہ فوڈ ڈیلیوری کمپنیوں کو نہیں پتہ کہ فوڈ کے ساتھ منشیات کی بھی ڈیلیوری کی جا رہی ہے، کابینہ سے منظوری لے لی ہے کہ اسکولوں میں بچوں کے منشیات کے ٹیسٹ لیں گے، جس بچے کا ڈرگ ٹیسٹ مثبت آئے گا صرف اس کے والدین کو مطلع کیا جائے گا۔ کراچی میں وزیر اطلاعات سندھ شرجیل میمن نے پریس کانفرنس میں کہا کہ حکومتِ سندھ نے ٹیکس کلیکشن کے لیے 130 ارب کا ہدف ایکسائز کو دیا تھا، ہم نے ہدف سے زیادہ ٹیکس جمع کیا، کچھ لوگ ٹیکس دینا چاہتے ہیں مگر لائنوں میں لگنے سے گھبراتے ہیں۔ ان کا کہنا ہے کہ سیلاب زدگان کے لیے دنیا کی سب سے بڑی رہائشی اسکیم شروع کی، ہم نے 21 لاکھ خاندانوں کو رہائش فراہم کرنے کا منصوبہ بنایا، نمبر پلیٹ نیلامی کا ہمیں اچھا فیڈ بیک ملا ہے۔

شرجیل میمن نے کہا کہ ہم نیلامی میں نمبر پلیٹ کے نرخ بڑھانے جا رہے ہیں، پہلے یہ پریمیئم نمبر سفارش پر ملتے تھے اور کم قیمت تھی۔ انہوں نے کہا کہ جب سے یہ حکومت آئی ہے نارکوٹکس ونگ نے 141 کارروائیاں کیں، ان کارروائیوں میں 158 افراد گرفتار، 114 گاڑیاں برآمد کیں۔ وزیرِ اطلاعات سندھ شرجیل میمن نے کہا کہ تمام صوبوں کو مل کر منشیات کے خلاف کارروائیاں کرنا ہوں گی، اے این ایف نے منشیات فروش قربان علی شاہ کو گرفتار کیا، منشیات کی رقم اس کے ذاتی اکاؤنٹس میں جمع ہوتی تھی۔ ان کا کہنا ہے کہ گرفتار منشیات فروش ضمانت پر ہے اس سے ہم نے کافی شواہد حاصل کیے، گرفتار منشیات فروش جس سے منشیات لیتا تھا وہ اسلام آباد میں ہے، وفاقی وزارتِ داخلہ کو خط لکھ رہے ہیں کہ اس کے خلاف کارروائی کی جائے۔

وزیرِ اطلاعات سندھ کا کہنا ہے کہ ہم نے بینکوں کو خط لکھے، ایک بینک نے تو ہمیں جواب بھی نہیں دیا، ایک شخص باسط خواجہ کو گرفتار کیا جو پوش علاقے میں رہتا ہے، جس شخص کو گرفتار کیا وہ ضمانت پر رہا ہوگیا، ضمانت کیس میں ایکسائز ڈپارٹمنٹ کو نوٹس ہی نہیں ملا۔ انہوں نے بتایا کہ اس شخص کا منشیات سپلائر اسلام آباد میں ہے، وہ شخص آج ایک بجے لاہور روانہ ہوگیا اور وہاں پہنچنے والا ہوگا، اس شخص کے قبضے سے 5 فون برآمد ہوئے ہیں۔ وزیر ایکسائز سندھ شرجیل میمن نے یہ بھی کہا کہ ہر محکمہ اور ہر صوبہ منشیات کے خلاف کارروائیاں کرے، آج سے ڈیجیٹل ڈیٹا بنائیں گے، اس ڈیٹا کی دیگر اداروں سے شیئرنگ بھی ہوگی۔