اسلام ٹائمز - ایرانی بندرگاہ بھارت کے حوالے کرنے سے پاکستان کو خطرہ ہے، خواجہ آصف

ایرانی بندرگاہ بھارت کے حوالے کرنے سے پاکستان کو خطرہ ہے، خواجہ آصف

9 مئی کیساتھ 8 فروری پر بھی جیوڈیشل کمیشن بننا چاہیئے، علی محمد خان

ایک نجی ٹی وی چینل کے پروگرام میں گفتگو کرتے ہوئے وزیر دفاع کا کہنا تھا کہ اگر امریکا ایران بھارت بندرگاہ معاہدے پر خاموش رہتا اور پاک ایران گیس پائپ لائن پر پابندیاں لگاتا ہے تو یہ دوستوں والی بات نہیں ہے۔

اسلام ٹائمز۔ پاکستان کے وزیر دفاع خواجہ محمد آصف نے ایک نجی ٹی وی چینل کے پروگرام میں گفتگو کرتے ہوئے کہا ہے کہ آئین توڑنے پر چاروں فوجی آمروں کا احتساب ہونا چاہیئے، ایران کے اپنی بندرگاہ بھارت کے حوالے کرنے سے پاکستان کو خطرہ ہے۔ تحریک انصاف کے رہنماء علی محمد خان نے کہا کہ جس نے بھی غلط کیا، چاہے وہ میرا والد کیوں نہ ہو، اسے سزا ملنی چاہیئے، قوم کے مسائل پارلیمنٹ میں حل ہوں گے تو سب سے بڑا فائدہ اسٹیبلشمنٹ کا ہوگا، عمر ایوب ڈیموکریٹ ہے، انہیں دادا کے گناہوں کے طعنے کیوں دیتے ہیں۔ نو مئی کے ساتھ آٹھ فروری پر بھی جیوڈیشل کمیشن بننا چاہیئے، آٹھ فروری کا الیکشن چوری کرکے آئین پر ڈاکہ ڈالا گیا ہے۔

وزیر دفاع خواجہ آصف نے کہا کہ فوجی مداخلت اور آئین توڑنے کا دروازہ ایوب خان نے کھولا تھا، سب سے پہلے آرٹیکل چھ اس پر لگانا چاہیئے۔ ایوب خان حکومت ایک اور فوجی آمر کے حوالے کرکے گیا، تاکہ مشرقی پاکستان کو علیحدہ کرنے کا اس کا پروگرام مکمل ہو، میں نے اپنے والد کے جنرل ضیاء الحق سے تعلق پر چار دفعہ معذرت کی ہے، عمر ایوب بھی اپنے دادا ایوب خان سے تعلق پر معذرت کریں، عمر ایوب کے والد کو نواز شریف نے اسپیکر اور لیڈر آف اپوزیشن بنایا تھا۔ عمر ایوب چار پارٹیوں کے ٹکٹ پر الیکشن لڑچکے ہیں، یہ پروگریسو کہاں سے ہوگئے، ہم نے مشرف سے کالی پٹیاں باندھ کر حلف لیا تو اسی حکومت نے مشرف کو فارغ بھی کیا تھا۔ خواجہ آصف کا کہنا تھا کہ ایران کے اپنی بندرگاہ بھارت کے حوالے کرنے سے پاکستان کو خطرہ ہے، پاکستان کو گوادر سے جو فائدے ہوسکتے ہیں، اس کی وجہ سے ضرور کمپرومائز ہوں گے۔

کراچی پورٹ میں چار ہزار ارب روپے سالانہ کی کرپشن ہے، کراچی کا یہ مافیا بھی گوادر پورٹ کو چلنے نہیں دے رہا، گوادر پورٹ کامیاب ہو جائے تو بلوچستان کی علیحدگی پسند تحریکوں کے لوگوں کو بھی روزگار ملے گا، امریکا ایران بھارت بندرگاہ معاہد ے پر خاموش رہتا اور پاک ایران گیس پائپ لائن پر پابندیاں لگاتا ہے تو یہ دوستوں والی بات نہیں ہے۔ خواجہ آصف نے کہا کہ آزاد کشمیر میں پچھلے تین سال سے مسئلہ چل رہا ہے، انڈیا نے آزاد کشمیر میں اپنے لوگ پلانٹ کیے ہوئے ہیں، انڈیا چاہتا ہے کہ آزاد کشمیر متنازع ہو جائے، آزاد کشمیر میں مطالبات مان لیے تھے، اس کے بعد کیا ہوا، آزاد کشمیر میں چار پانچ پاور اسٹیشنز کی حفاظت کیلئے ایف سی اور پیراملٹری فورسز ہیں، وہاں سے حالات کنٹرول کرنے کیلئے انہیں بلایا گیا تھا۔