اسلام ٹائمز - چئیرمین سینیٹ سید یوسف رضا گیلانی سے گورنر خیبر پختونخوا فیصل کریم کنڈی کی ملاقات

چئیرمین سینیٹ سید یوسف رضا گیلانی سے گورنر خیبر پختونخوا فیصل کریم کنڈی کی ملاقات

چئیر مین سینیٹ سید یوسف رضا گیلانی نے پارٹی امور کا ذکر کرتے ہوئے کہا کہ پاکستان پیپلزپارٹی نے ہمیشہ نادار اور غریب خواتین کی فلاح و بہبود کے لیے کام کیا ہے، اس کی سب سے بڑی مثال بے نظیر انکم سپورٹ پروگرام ہے، اس پروگرام کا مقصد مستقل بنیادوں پر خواتین کو معاشی طور پر مضبوط کرنا ہے، ہماری کوشش ہے کہ ان کے گھر کے دیگر بے روزگار افراد کے لیے بھی ملازمت کا بندوبست کیا جائے۔

اسلام ٹائمز۔ سابق وزیراعظم اور چیئرمین سینیٹ سید یوسف رضا گیلانی سے گورنر کے پی کے فیصل کریم کنڈی نے ان کی رہائش گاہ پر ملاقات کی۔ چئیرمین سینیٹ نے قبل ازیں گورنر کے پی کے کے اعزاز میں عصرانہ دیا۔ دونوں رہنماوں نے ملاقات کے دوران ملک کی موجودہ معاشی و سیاسی صورت حال پر سیر حاصل گفتگو کی۔ اس موقع پر دونوں قائدین نے ملک کے موجودہ حالات کے تناظر میں سیاسی استحکام کی ضرورت پر زور دیتے ہوئے کہا کہ اس سے ملک میں معاشی استحکام پیدا ہوگا۔ انہوں نے کہا اس سلسلے میں سب کو اپنا کردار ادا کرنا چاہیے۔ چئیرمین سینیٹ سید یوسف رضا گیلانی نے پارٹی امور کا ذکر کرتے ہوئے کہا کہ پاکستان پیپلزپارٹی نے ہمیشہ نادار اور غریب خواتین کی فلاح و بہبود کے لیے کام کیا ہے۔ اس کی سب سے بڑی مثال بے نظیر انکم سپورٹ پروگرام ہے، اس پروگرام کا مقصد مستقل بنیادوں پر خواتین کو معاشی طور پر مضبوط کرنا ہے۔ ہماری کوشش ہے کہ ان کے گھر کے دیگر بے روزگار افراد کے لیے بھی ملازمت کا بندوبست کیا جائے۔

اُنہوں نے مزید کہا کہ پیپلزپارٹی روزگار کی فراہمی کے لیے ہمیشہ کردار ادا کرتی ہے اور آئندہ بھی یہ کردار ادا کرتی رہے گی کیونکہ یہ ہمارے منشور کا حصہ بھی ہے۔ اس موقع پر دونوں رہنماوں نے پارٹی کو مزید فعال اور مستحکم کرنے کے لیے مختلف اقدامات پر بھی بات چیت کی۔ عصرانے میں ملتان کے سابق ضلع ناظم میاں فیصل مختار، معروف صنعت کار اور ایوان تجارت و صنعت کے سابق صدر میاں تنویر اے شیخ، معروف صنعتکاروں میاں ذوالفقار انجم، میاں عامر نسیم، ایم پی اے سید علی حیدر گیلانی، سینئر نائب صدر پاکستان پیپلزپارٹی جنوبی پنجاب خواجہ رضوان عالم، جنرل سیکریٹری پیپلزپارٹی جنوبی پنجاب ڈاکٹر جاوید صدیقی، مہر محمد اشرف سیال ڈائیریکٹر ایئر سیال، سید ضیغم گیلانی، مہر اسد سیال، نعیم احمد خان اور ملک ریاض حسین نے شرکت کی۔