اسلام ٹائمز - غزہ میں مظالم نے صہونیت کا اصل چہرہ پوری دنیا کے سامنے واضح کر دیا، علامہ امین شہیدی

غزہ میں مظالم نے صہونیت کا اصل چہرہ پوری دنیا کے سامنے واضح کر دیا، علامہ امین شہیدی

کوئٹہ میں تقدس القدس کانفرنس سے خطاب کرتے ہوئے علامہ امین شہیدی نے کہا کہ پوری دنیا میں عوام نے سڑکوں پر نکل کا ثابت کیا کہ انکے دل فلسطین کیساتھ دھڑکتے ہیں، جبکہ حمکرانوں نے ثابت کیا کہ وہ اسرائیل کے آلہ کار ہیں۔

اسلام ٹائمز۔ امت واحدہ پاکستان کے سربراہ علامہ محمد امین شہیدی کا کہنا ہے کہ اسرائیل کی معیشت ہر گزرتے دن کے ساتھ کمزور ہو رہی ہے۔ اب تک اسرائیلی حکومت کو دس ارب کا نقصان ہوچکا ہے۔ حماس دِلوں کی دھڑکن کا نام ہے۔ اسرائیل ایک کمزور ریاست ہے۔ حملہ کے پہلے روز ہی اسرائیلیوں کی چیخیں نکل گئی ہیں۔ ان خیالات کا اظہار انہوں نے کوئٹہ میں تقدس القدس کانفرنس سے خطاب کرتے ہوئے کیا۔ علامہ امین شہیدی نے کہا کہ غزہ میں ہونے والے واقعات اور مظالم نے صہونیت کا اصل چہرہ پوری دنیا کے سامنے واضح کر دیا۔ انہوں نے واضح کیا کہ دنیا کی بڑی طاقتیں اور سرمایہ دارانہ نظام کے شیلٹر میں متحد عناصر کا مشترکہ ایجنڈا ہے کہ اسرائیل کے نام پر صہیونی ریاست کو مضبوط اور عالم اسلام کو ڈسٹرب رکھا جائے۔ علامہ امین شہیدی نے مزید کہا کہ یہ اسلام اور کفر کی جنگ ہے۔ حق اور باطل کی جنگ ہے۔ آنے والا ووقت فلسطینیوں کا ہے۔ اس جنگ سے بھی واضح ہوگیا ہے کہ جب امام مہدی (عج) کا ظہور ہوگا تو حق والے کہاں ہوں گے باطل والوں کا ٹھکانا ہوگا۔

علامہ امین شہیدی کا کہنا تھا کہ جب عراق یمن اور لبنان سے اسرائیل پہ بمباری شروع ہوئی تو سعودی عرب نے اسرائیل کی فضائیہ مدد کی۔ عرب صحافیوں نے بھی یہ سوال اٹھایا ہے کہ اسرائیل کی بعض مسلم ممالک نے بھی مدد کی ہے۔ مسلمان ممالک کو اتنی توفیق بھی نہیں ہوئی کہ اسرائیل میں اپنا سفارت خانہ بند کردیں۔ یہ وہ ممالک ہیں جنہوں نے اسرائیل کو تسلیم کیا تھا جبکہ دوسری طرف غیر مسلم ممالک نے انسانی بنیادوں پہ اسرائیل سے تعلق ختم کردیا ہے۔ ترکی کا ابھی تجارتی معاہدہ چل رہا ہے، جبکہ دوسرے ممالک نے ان کی تیل کی کمی کو پوری کی۔ علامہ محمد امین شہیدی کا کہنا تھا کہ خون کے سوداگر مسلم حکمرانوں سے امت مسلمہ کو کوئی امید نہیں ہونی چاہئے وہ بظاہر اسلام کا لبادہ پہنے ہوئے ہیں، مگر انکے غلام ہیں۔ علامہ امین شہیدی نے اپنی تقریر میں فلسطین کے معاملے پر اسلامی ممالک کے کردار پر روشنی ڈالی اور بلواستہ یا بلاواسطہ اسرائیل کی حمایت کرنے والے ممالک کو تنقید کا نشانہ بنایا۔ انہوں نے کہا کہ پوری دنیا میں عوام نے سڑکوں پر نکل کا ثابت کیا کہ انکے دل فلسطین کے ساتھ دھڑکتے ہیں، جبکہ حمکرانوں نے ثابت کیا کہ وہ اسرائیل کے آلہ کار ہیں۔