اسلام ٹائمز - عمران خان سے کہا تھا قمر باجوہ کو چھوڑ دیں، وہ اب ریٹائر ہوگئے ہیں، حامد خان

عمران خان سے کہا تھا قمر باجوہ کو چھوڑ دیں، وہ اب ریٹائر ہوگئے ہیں، حامد خان

پی ٹی آئی کے بانی رکن کا کہنا تھا کہ نواز شریف جب زیرعتاب تھے تو اس وقت ان کی جماعت کو الیکشن میں پوری آزادی تھی، میاں صاحب کی طرح پی ٹی آئی سربراہ کو چیئرمین نہ بھی مانیں پھر بھی وہی اتھارٹی ہیں۔

اسلام ٹائمز۔ پی ٹی آئی کے بانی رکن اور معروف قانون دان حامد خان کا کہنا ہے کہ چیئرمین پی ٹی آئی عمران خان سے کہا تھا قمر باجوہ کو چھوڑ دیں وہ اب ریٹائر ہوگئے ہیں، بات کو نہ بڑھائیں۔ تفصیلات کے مطابق پی ٹی آئی بانی رکن اور معروف قانون دان حامد خان نے ایک انٹرویو میں کہا کہ 9 مئی واقعات کو چیئرمین پی ٹی آئی سے نہیں جوڑ سکتے، وہ تو زیرحراست تھے۔ معروف قانون دان نے بتایا کہ اب جوسلطانی گواہ بننے کو تیار ہیں یہ وہ لوگ ہیں جو اسی لیے پالے جاتے ہیں، یہ لوگ پہلے کہتے تھے یہ نہیں ہوا، اب کہتے ہیں یہ ہوا ہے تو ان کی کیا کریڈیبلٹی ہے۔؟ حامد خان کا چیئرمین پی ٹی آئی سے گفتگو کے بارے میں بتاتے ہوئے کہنا تھا کہ چیئرمین پی ٹی آئی سے کہا تھا عدلیہ، الیکشن کمیشن سے نہ بگاڑیں لیکن اسوقت پی ٹی آئی چیئرمین کو جو مشورے دینے والے تھے وہ بات بڑھاتے تھے، میرے سامنے تو چیئرمین اتفاق کرتے تھے لیکن بعد میں آنیوالے معاملہ الجھا دیتے تھے۔

ان کا مزید بتانا تھا کہ چیئرمین پی ٹی آئی سے کہا تھا قمر باجوہ کو چھوڑ دیں وہ اب ریٹائر ہوگئے ہیں، غیرضروری لوگوں کے نام لے کر بات کو نہ بڑھائیں۔ انتخابات کے حوالے سے پی ٹی آئی بانی رکن نے کہا کہ پی ٹی آئی بڑی جماعت ہے اس کے بغیر انتخابات کی کوئی ساکھ نہیں ہوگی۔ نواز شریف کا حوالہ دیتے ہوئے حامد خان نے کہا کہ نواز شریف جب زیرعتاب تھے تو اس وقت ان کی جماعت کو الیکشن میں پوری آزادی تھی، میاں صاحب کی طرح پی ٹی آئی سربراہ کو چیئرمین نہ بھی مانیں پھر بھی وہی اتھارٹی ہیں۔ ان کا مزید کہنا تھا کہ 2008ء کی وکلا تحریک کی طرح وکلا میں کچھ بظاہر ہمارے ساتھ ہیں مگر اندر سے نہیں، ہمیں ایسے لوگوں کا پتہ ہے، کچھ وکلا چہرہ چھپانے کیلئے 90 دن میں الیکشن کا کہتے ہیں۔