اسلام ٹائمز - کراچی، اسماعیل ہنیہ کی شہادت پر احتجاجی ریلی

کراچی، اسماعیل ہنیہ کی شہادت پر احتجاجی ریلی

شرکائے ریلی نے حماس رہنما کے قتل پر امریکا اور اسرائیل کے خلاف زبردست نعرے لگائے۔ احتجاجی ریلی کے اختتام پر شرکاء نے امریکی، اسرائیلی و برطانوی پرچم بھی نذر آتش کئے۔

اسلام ٹائمز۔ فلسطین فاؤنڈیشن پاکستان اور امامیہ اسٹوڈنٹس آرگنائزیشن کراچی ڈویژن کی جانب سے حماس کے رہنما اسماعیل ہنیہ کی شہادت پر امریکا اور غاصب صہیونی حکومت اسرائیل کے خلاف مشترکہ احتجاجی ریلی نکالی گئی۔ ریلی فوارہ چوک سے شروع ہو کر کراچی پریس کلب پر اختتام پذیر ہوئی۔ ریلی میں کثیر تعداد میں خواتین اور بچوں سمیت شہریوں نے شرکت کی۔ احتجاجی ریلی میں آئی ایس او پاکستان کے مرکزی صدر حسن عارف، فلسطین فاؤنڈیشن کے سیکریٹری جنرل ڈاکٹر صابر ابو مریم، جماعت اسلامی کے مرکزی رہنما ڈاکٹر معراج الہدیٰ صدیقی، سابق رکن سندھ اسمبلی محفوظ یار خان، مجلس وحدت مسلمین سندھ کے صدر علامہ باقر عباس زیدی، جمعیت علماء پاکستان کے رہنما علامہ قاضی احمد نورانی صدیقی، علامہ عقیل انجم قادری، پاکستان تحریک انصاف کے رہنما اسرار عباسی، مسلم لیگ (نواز) کے رہنما پیر ازہر علی ہمدانی، پاکستان عوامی تحریک کراچی کے صدر ثاقب نوشاہی نے خطاب کیا۔ اس موقع پر علامہ مختار امامی، علامہ مبشر حسن، قاضی زاہد حسین، جمعیت اہلحدیث کے مفتی مرتضیٰ رحمانی، پاسٹر ڈینیئل سراج، پروفیسر ڈاکٹر زاہد علی زاہدی، مولانا حیات عباس نجفی، مولانا ملک عباس، مولانا ہادی ولایتی، مولانا روح اللہ رضوی، مولانا یاسین مجلسی اور مولانا محمد جوادی سمیت ڈویژنل صدر آئی ایس او کراچی ظفر حیدر بھی موجود تھے۔ شرکائے ریلی نے ہاتھوں میں بینرز اور پلے کارڈز اٹھا رکھے تھے، جن پر ہم سب اسماعیل ہانیہ ہیں، ہم سب حماس ہیں و دیگر نعرے لکھے ہوئے تھے۔ شرکاء نے شہید اسماعیل ہانیہ کی تصاویر بھی اٹھا رکھی تھیں۔ شرکائے ریلی نے حماس رہنما کے قتل پر امریکا اور اسرائیل کے خلاف زبردست نعرے لگائے۔ احتجاجی ریلی کے اختتام پر شرکاء نے امریکی، اسرائیلی و برطانوی پرچم بھی نذر آتش کئے۔