اسلام ٹائمز - لاہور، جامعہ عروۃ الوثقیٰ میں حرمت محرم کانفرنس

لاہور، جامعہ عروۃ الوثقیٰ میں حرمت محرم کانفرنس

ٹی بی یو ایم کے سربراہ کا کہنا تھا کہ اسرائیل حزب اللہ لبنان کے ساتھ جنگ کی تیاری کر رہا ہے جس کے لئے سید مقاومت سید حسن نصر اللہ بالکل آمادہ ہیں۔ انہوں نے تاکید کی کہ حجازی سنی اور کوفی شیعہ کے اسوہ پر نہ چلیں، اس بے حسی اور لاتعلقی سے باہر آئیں اور آج کی کربلا میں شیعہ و سنی دونوں پہنچ کر سرخرو ہوں۔

اسلام ٹائمز۔ جامعہ عروۃ الوثقیٰ میں غزہ المیہ پر دنیائے اسلام کی بے حسی کے اسباب، عوامل و وجوہات کے عنوان سے ’’حرمت محرم کانفرنس‘‘ منعقد ہوئی جس کی صدارت سربراہ تحریک بیداری امت مصطفی علامہ سید جواد نقوی نے کی۔ کانفرنس میں تمام اسلامی مکاتب فکر سے علماء کرام شریک ہوئے جن میں سابق امیر جماعت اسلامی سینٹر سراج الحق، صدر رابطۃ المدارس پاکستان مولانا عبدالمالک، پیر دیوان عثمان فرید چشتی، پیر سید محمد حبیب عرفانی، نائب امیر مرکزی جمعیت اہلحدیث پاکستان پروفیسر عبدالغفور راشد، پیر سید محمد عثمان نوری، پیر خواجہ معین الدین محبوب کوریجہ، ناظم شعبہ سمع و بصر تنظیم اسلامی پاکستان ڈاکٹر آصف حمید، پیر غلام رسول اویسی، صدر علماء کونسل منہاج القرآن انٹرنیشنل علامہ غلام اصغر صدیقی، آستانہ عالیہ گولڑہ شریف حافظ محمد حسین اور صدر اتحاد المدارس العربیہ مفتی محمد زبیر فہیم نمایاں تھے۔