اسلام ٹائمز - علمی نشست "قرآن کی نگاہ میں حج ابراہیمی و برائت از مشرکین"

ایرانی قونصلیٹ کے تحت خانہ فرہنگ ایران کراچی میں

علمی نشست "قرآن کی نگاہ میں حج ابراہیمی و برائت از مشرکین"

مقررین نے تاکید کی کہ حج صرف ایک کارِ ثواب و انفرادی عبادت نہیں ہے، بلکہ اس کی روح یہ ہے کہ مسلمان ایک دوسرے کے حالات و مشکلات سے آشنا ہوں اور یقیناً اس سال اہل اسلام کو چاہیے کہ وہ غزہ کے مظلوموں کو اپنی اولی ترجیح قرار دیں۔

اسلام ٹائمز۔ موسم حج کے قریب آتے ہی شہر کراچی میں جمہوری اسلامی ایران کے قونصل خانے کے زیر اہتمام خانہ فرہنگ ایران میں "قرآن کی نگاہ میں حج ابراہیمی اور برائت از مشرکین" کے عنوان ایک علمی نشست منعقد ہوئی، جس میں مکتب تشیع و اہلسنت کی برجستہ علمی و دینی شخصیات کے ساتھ ساتھ وکلاء، محققین، پروفیسرز اور اساتذہ نے شرکت کی۔ اس علمی نشست کے آغاز میں کراچی میں ایران کے قونصل جنرل حسن نوریان، ایرانی قونصل خانے کے کلچرل اتاشی و خانہ فرہنگ ایران کراچی کے ڈائریکٹر ڈاکٹر سعید طالبی نیا نے خطاب کیا۔ مقررین نے موسم حج کے حوالے سے غزہ و رفح میں جاری اسرائیلی ظلم و ستم کی روک تھام کیلئے شیعہ سنی اتحاد اور مشرکین سے برائت پر زور دیا۔ مختلف مکاتب و شعبہ ہائے زندگی سے تعلق رکھنے والی برجستہ شخصیات نے اس امر پر تاکید کی کہ حج صرف ایک کارِ ثواب و انفرادی عبادت نہیں ہے، بلکہ اس کی روح یہ ہے کہ مسلمان ایک دوسرے کے حالات و مشکلات سے آشنا ہوں اور یقیناً اس سال اہل اسلام کو چاہیے کہ وہ غزہ کے مظلوموں کو اپنی اولی ترجیح قرار دیں۔ علمی نشست کے آخر میں تمام شرکاء نے فلسطین کی حمایت اور اسرائیل کی مذمت پر مشتمل متفقہ طور پر قرارداد بھی منظور کی۔