اسلام ٹائمز - اسلامی جمعیت طلبہ جامعہ کراچی کے تحت یکجہتی غزہ ریلی

اسلامی جمعیت طلبہ جامعہ کراچی کے تحت یکجہتی غزہ ریلی

پوائنٹ ٹرمینل پر ریلی سے خطاب میں منعم ظفر خان نے کہا کہ اسرائیلی جارحیت کے خلاف کولمبیا یونیورسٹی کے طلبہ کی تحریک دیگر جامعات میں بھی پھیل رہی ہے، پرعزم طلباء کا مطالبہ ہے کہ غزہ میں جاری اسرائیلی جارحیت ختم کی جائے، ہم کولمبیا یونیورسٹی کے طلبہ پر پولیس تشدد اور شیلنگ کی شدید مذمت کرتے ہیں۔

اسلام ٹائمز۔ اسلامی جمعیت طلبہ کی جانب سے جامعہ کراچی میں اہل غزہ کی نسل کشی اور کولمبیا یونیورسٹی کے طلباء پر پولیس تشدد کے خلاف، کولمبیا یونیورسٹی کے طلباء اور اہل غزہ سے اظہارِ یکجہتی کے سلسلے میں منعقدہ ”یکجہتی غزہ ریلی“ کا انعقاد کیا گیا۔ ریلی سے جماعت اسلامی کراچی کے عبوری امیر منعم ظفر خان اور ناظم اسلامی جمعیت طلبہ کراچی آبش صدیقی نے خطاب کیا۔ ریلی میں یونیورسٹی کے طلبہ و طالبات نے بڑی تعداد میں شرکت کی اور کولمبیا یونیورسٹی کے طلباء کے ساتھ کی جانے والی زیادتیوں کے خلاف شدید غم و غصے کا اظہار کیا اور اسرائیل کی جانب سے فلسطین میں جاری دہشت گردی کے خلاف بھی شدید نعرے لگائے۔ شرکاء نے ہاتھوں میں بینرز اور پلے کارڈز اٹھائے ہوئے تھے جن پر تحریر تھا Stop Genocide in Gaza، we stand with palestine، القدس لنا، بیت المقدس مسلمانوں کا قبلہ اول ہے، شرکاء نے فلسطینیوں سے اظہار یکجہتی کے لیے مخصوص فلسطینی رومال اور پرچم اٹھائے ہوئے تھے۔