اسلام ٹائمز - ساس ویلی نگر حلقہ پانچ میں جلسہ عام کا انعقاد

ساس ویلی نگر حلقہ پانچ میں جلسہ عام کا انعقاد

ساس ویلی نگر حلقہ پانچ کیجانب سے منعقدہ جلسہ عام سے خطاب میں اسلامی تحریک پاکستان کے سیکرٹری جنرل کا کہنا تھا کہ ہمارا مطالبہ پہلے سے واضح اور روشن ہے کہ گلگت بلتستان کو آئینی حق دیا جائے، اس خوبصورت وادی کو صوبائی درجہ یہاں کی عوام کا آئینی حق ہے۔

اسلام ٹائمز۔ اسلامی تحریک پاکستان کے سیکرٹری جنرل علامہ شبیر حسن میثمی نے نگر ویلی گلگت بلتستان میں اسلامی تحریک ساس ویلی نگر حلقہ پانچ کی جانب سے منعقدہ جلسہ عام سے اہم خطاب کیا۔ ان کا کہنا تھا کہ میں شکریہ ادا کرتا ہوں کہ آپ نے اتنی محبت دی، یہ محبت ہے نظام کے ساتھ، پاکستان میں موجود تشیع کے قومی پلیٹ فارم کے ساتھ، گلگت بلتستان کی موجودہ صورتحال آپ کے سامنے ہے، ہمارا مطالبہ پہلے سے واضح اور روشن ہے کہ گلگت بلتستان کو آئینی حق دیا جائے، اس خوبصورت وادی کو صوبائی درجہ یہاں کی عوام کا آئینی حق ہے۔

یہ جدوجہد قائد ملت جعفریہ پاکستان آیت اللہ سید ساجد علی نقوی کی سرپرستی میں جاری ہے، یہ سرزمین امیرالمومنین علی ابن ابی طالب علیہ السلام کے چاہنے والوں کی پرامن سرزمین ہے۔ اسلامی تحریک پاکستان کی جدوجہد اور آپ کی سسٹم سے وابستگی اس بات کی دلیل ہے کہ پاکستان میں تشیع قائد ملت جعفریہ پاکستان کی قیادت میں سربلند و سرفراز ہے۔ جلسہ عام سے دیگر علماء کرام نے بھی اہم خطابات کئے، سیکرٹری جنرل کے ہمراہ اعلیٰ سطحی وفد بھی موجود تھا۔