اسلام ٹائمز - ملتان میں یوم القدس ریلی

رہنمائوں نے خطاب کرتے ہوئے کہا کہ غزہ کے مظلومین عالم اسلام کی جنگ لڑ رہے ہیں، غزہ کی استقامت نے دنیا کو حیران کر دیا ہے، اسرائیل کا بیانیہ دنیا نے مسترد کر دیا، آج دنیا میں غزہ و مظلومین فلسطین کے حق میں باتیں ہو رہی ہیں، امریکہ کو شکست ہوئی ہے، اسرائیل کو شکست ہوئی ہے۔

اسلام ٹائمز۔ عالمی یوم القدس کے موقع پر امام بارگاہ ابوالفضل العباس سے چوک کمہارانوالہ تک قبلہ اول کی آزادی اور مظلومین فلسطین و غزہ کی حمایت میں مرکزی احتجاجی ریلی نکالی گئی، ریلی کی قیادت مجلس علمائے مکتب اہلبیت جنوبی پنجاب کے صوبائی صدر علامہ قاضی نادر حسین علوی، مجلس اتحاد بین المومنین کے سربراہ علامہ غلام مصطفیٰ انصاری، مجلس وحدت مسلمین عزاداری ونگ کے صوبائی صدر انجینئر سخاوت علی سیال، سید اقبال مہدی ایڈووکیٹ، علامہ قاضی فیاض حسین علوی، وحدت یوتھ پاکستان کے مرکزی ڈپٹی سیکرٹری تنظیم سازی مرزا وجاہت علی، جواد رضا جعفری، علامہ معید احمد القادری، علامہ وسیم معصومی اور ثقلین نقوی نے کی۔ شرکاء سے خطاب کرتے ہوئے علامہ قاضی نادر حسین علوی نے کہا غزہ کے مظلومین عالم اسلام کی جنگ لڑ رہے ہیں، غزہ کی استقامت نے دنیا کو حیران کر دیا ہے، اسرائیل کا بیانیہ دنیا نے مسترد کر دیا، آج دنیا میں غزہ و مظلومین فلسطین کے حق میں باتیں ہو رہی ہیں، امریکہ کو شکست ہوئی ہے، اسرائیل کو شکست ہوئی ہے۔ غزہ کے دو پہلو ہیں، ایک اسرائیل کا سیاہ ظالمانہ مکروہ چہرہ سامنے آیا، دوسرا پہلو غزہ کے مظلومین کی استقامت اور بہادری کی صورت میں ہے۔ امریکہ برطانیہ اور اسرائیل ہار چکے ہیں۔

علامہ غلام مصطفیٰ انصاری نے کہا کہ امت مسلمہ کے حکمرانوں کی فلسطینی مسلمانوں پر مظالم پر خاموشی قابل تشویش ہے، اقوام متحدہ اور انسانی حقوق کی تنظیموں کی جانب سے اسرائیلی کردار نسل کشی قرار دیا جا چکا ہے، مسلم امہ کے ساتھ ساتھ اب تو یورپ اور امریکہ میں بھی فلسطین میں جاری انسانیت سوز و مظالم پر آواز بلند ہونا شروع ہوچکی ہے۔ انجینیئر مہر سخاوت سیال نے کہا کہ فلسطین کی عملی طور پر امداد کے لیے قدم بڑھایا جائے اور فلسطین کے معاملے پر اسرائیل کو دو ٹوک جواب دیا جائے۔ ڈاکٹر علامہ فیاض علوی نے کہا فلسطینی ریاست کے قیام اور قبلہ اول کی آزادی تک ہماری جدوجہد جاری رہے گی، قبلہ اول پر اسرائیلی ناجائز قبضے کی شدید مذمت کرتے ہیں، یوم القدس تمام مظلوموں کی حمایت کا دن ہے۔ مرکزی احتجاجی ریلی میں علامہ طاہر عباس نقوی، عون رضا گوپانگ ایڈووکیٹ، علامہ ہادی حسین، تیمور حسن، علامہ غلام جعفر انصاری، مظہر عباس کات، ملک عمران حیدر، ڈاکٹر شاہد، علی رضا گیلانی، غدیر عباس شیرازی، فرمان علی، حسن حیدری، احسن رضا، دل شیر خان سمیت مرد و جوان بوڑھے بچے اور خواتین نے کثیر تعداد میں شرکت کی۔ مظاہرین نے اسرائیلی جارحیت کے خلاف پلے کارڈ اٹھا رکھے تھے، اس موقع پر اسرائیلی پروڈکٹ کا بائیکاٹ کیا گیا اور پرچم نذر آتش کیا گیا۔