QR Code

کویت میں ہفتہ وحدت کی مناسبت سے محفل نعت و منقبت

4 Oct 2023 22:42

اختتام محفل پر پاکستان سے خصوصی طور پر تشریف لائے ہوئے وائس چیئرمین مجلس وحدت مسلمین پاکستان علامہ سید احمد اقبال رضوی نے خطاب کیا۔ مولانا سید وصی حیدر نقوی نے نظامت کے فرائض ادا کئے جبکہ دعائیہ کلمات حجہ الاسلام مرزا عسکری حسین نے ادا کئے۔ کمیونٹی ویلفیئر اتاشی سفارت خانہ اسلامی جمہوریہ پاکستان فرخ امیر سیال محفل کے مہمان خصوصی تھے۔

اسلام ٹائمز۔ مسجد شعبان سالمیہ کویت میں مذہبی سماجی تنظیم ”مومنین کویت“ کے زیر اہتمام ہفتۂ وحدت اسلامی 12 تا 17 ربیع الاوّل بفرمان رہبرِ کبیر امام خمینی رحمۃ اللّٰہ علیہ جشن عید میلاد النبی (ص) و میلاد امام جعفر الصادق علیہ السلام کی مناسبت سے محفل نعت و منقبت کا اہتمام کیا گیا، جس میں کویت کے معروف نعت خواں فیصل نقشبندی، عبدالرؤف بھٹی، حسن نقوی، جواد حسینی اور شاہد ترابی، وقار عباس اور نیر عباس رضوی نے نعتیہ کلام پیش کئے جبکہ اختتام محفل پر پاکستان سے خصوصی طور پر تشریف لائے ہوئے وائس چیئرمین مجلس وحدت مسلمین پاکستان علامہ سید احمد اقبال رضوی نے خطاب کیا۔ مولانا سید وصی حیدر نقوی نے نظامت کے فرائض ادا کئے جبکہ دعائیہ کلمات حجہ الاسلام مرزا عسکری حسین نے ادا کئے۔ کمیونٹی ویلفیئر اتاشی سفارت خانہ اسلامی جمہوریہ پاکستان فرخ امیر سیال محفل کے مہمان خصوصی تھے۔ مقررین نے امت مسلمہ میں نکتہ وحدت ذات رسول اسلام کے حوالے سے آپ کی سیرت، تعلیمات اور فرامین پر مکمل عملداری پر زور دیا۔ مقررین نے داخلی اختلاف کو پس پشت ڈال کر باہمی مشترکات پر جمع ہوکر مشترکہ دشمن کو پہچاننے اور اس کی چالوں کو ناکام بنانے پر بھی زور دیا۔ اختتام محفل پر شرکاء میں عمرہ وزیارت کے ٹکٹ سمیت متعدد بیش قیمت انعامات بھی تقسیم کئے گئے۔ محفل میلاد میں منہاج القرآن انٹرنیشنل، اسلامک ایجوکیشن کمیٹی (جماعت اسلامی)، پاکستان تحریک انصاف کویت، پاکستان پیپلز پارٹی کویت، پاکستان مسلم لیگ (ن) کویت، پاکستانی ایمپائمنٹ فورم کویت اور اتحاد بلتستان کویت کے اراکین شریک ہوئے۔

خبر کا کوڈ: 1085999