QR Code
فلسطین فاؤنڈیشن کے تحت کراچی میں القدس کانفرنس
9 Apr 2023 17:09
کانفرنس سے خطاب کرتے ہوئے سیاسی و مذہبی رہنماؤں کا کہنا تھا کہ 23 رمضان المبارک کو دنیا بھر کی طرح پاکستان بھر میں عالمی یوم القدس منایا جائے گا، وہ دن دور نہیں کہ جب اسرائیل صفحہ ہستی سے مٹ جائے گا، رمضان کی آمد کے ساتھ جہاں امت قران پاک اور صوم و صلاۃ کی جانب راغب ہوتی ہے، اس کے ساتھ ہی گزشتہ چالیس برس سے یوم القدس منارہی ہے اور فلسطین عوام سے اظہار یکجہتی کرہی جس کا سہرا امام خمینی کے سر جاتا ہے، پاکستان میں اسرائیل کے لئے لابنگ کرنے والوں کو عبرتناک سزا دینی چاہیئے۔
اسلام ٹائمز۔ عالمی یوم القدس کی مناسبت سے فلسطین فاؤنڈیشن پاکستان کے زیر اہتمام القدس کانفرنس بعنوان ”فلسطین کا دفاع پاکستان کا دفاع ہے”کا انعقاد کراچی کے مقامی ہوٹل میں کیا گیا۔ القدس کانفرنس کے مہمان خصوصی پاکستان پیپلز پارٹی کے رہنما و صوبائی وزیر قانون بیرسٹر مرتضی وہاب تھے جبکہ کانفرنس میں تمام سیاسی و مذہبی جماعتوں کے قائدین بشمول فلسطین فاؤنڈیشن پاکستان کے سیکرٹری جنرل ڈاکٹر صابر ابو مریم، پاکستان تحریک انصاف کے سینئر رہنما فردوس شمیم، پاکستان مسلم لیگ نواز کے سینیٹر نہال ہاشمی، ملی یکجہتی کونسل سندھ کے صدر اسد اللہ بھٹو، جماعت اسلامی کے نائب امیر ڈاکٹر معراج الہدی صدیقی، متحدہ قومی موومنٹ پاکستان کے سابق اراکین سندھ اسمبلی محفوظ یار خان، میجر (ر) قمر عباس، مجلس وحدت مسلمین پاکستان سندھ کے صدر علامہ باقر زیدی، جمعیت علماء پاکستان کے رہنما علامہ عقیل انجم، عوامی نیشنل پارٹی کے رہنما یونس بونیری، پاکستان عوامی تحریک کے رہنما ثاقب نوشاہی، معروف مذہبی رہنما مفتی فیروز الدین رحمانی، شیعہ علماء کونسل کے رہنما علامہ ناظر تقوی ، سابق ایڈوائزر حکومت پاکستان ڈاکٹر عالیہ امام اور دیگر نے خطاب کیا۔ کانفرنس کی میزبانی کے فرائض ڈاکٹر علی واصف نے انجام دیئے۔
خبر کا کوڈ: 1051396