اسلام ٹائمز - اسرائیل پھر ناکام ہوگیا

اسلام ٹائمز: حزب اللہ کی کامیابیوں نے پوری دنیا کے سامنے غاصب اسرائیل اور اسکے ہمنوائوں امریکہ اور برطانیہ سمیت یورپی حکومتوں کو ذلیل و رسوا کرکے رکھ دیا ہے۔ منگل کے روز ہونیوالی کارروائیوں میں چھ بڑے آپریشن انجام دیئے گئے، جسکے بعد پورے مقبوضہ علاقوں میں خطرے کے سائرن بجتے رہے اور غاصب اسرائیلی حکومت نے ایمرجنسی کا اعلان کیا۔ غاصب اسرائیل ایک کے بعد ایک دہشتگردانہ کارروائی کے بعد مسلسل شکست کے دہانے پر پہنچتا چلا جا رہا ہے اور حزب اللہ کی کارروائیوں میں کمی آنے کی بجائے مزید اضافہ ہونا اس بات کی دلیل ہے کہ حزب اللہ کے بارے میں غاصب اسرائیلی دشمن کے دعوے اور حساب کتاب مکمل طور پر غلط ثابت ہوا ہے اور اسرائیل پہلے غزہ میں ناکام ہوا اور اب مسلسل لبنان میں ناکامی کا سامنا ہے۔

تحریر: ڈاکٹر صابر ابو مریم
سیکرٹری جنرل فلسطین فائونڈیشن پاکستان

غاصب صیہونی ریاست اسرائیل ہمیشہ سے ہی فلسطین سمیت شام اور لبنان کے علاقوں میں در اندازی اور جارحیت انجام دیتی آئی ہے۔ ایک زمانہ تھا، جب اسرائیلی فوجیں بیروت میں دندناتی پھرتی تھیں، لیکن یہی حزب اللہ ہے کہ جس نے غاصب اسرائیلی دشمن کو بیروت اور لبنان سے نکال باہر پھینکا اور ذلت و رسوائی سے دوچار کیا۔ غاصب اسرائیلی دشمن نے 2006ء میں ایک ناکام کوشش کی، لیکن 33 روزہ جنگ میں حزب اللہ نے غاصب اسرائیلی دشمن کو دھول چٹا کر چاروں شانے چت کر دیا تھا۔ گذشتہ سال سات اکتوبر سے شروع ہونے والے طوفان اقصیٰ کے بعد سے جنوبی لبنان کے ایک سو بیس کلو میٹر بارڈر پر حزب اللہ نے غاصب اسرائیلی دشمن کے خلاف جنگ کا آغاز اس لئے کیا، کیونکہ دشمن نے غزہ پر بڑے پیمانہ پر جنگ مسلط کر دی تھی اور غزہ میں معصوم انسانوں کا قتل عام کیا، یعنی فلسطینیوں کی نسل کشی کی گئی۔ حزب اللہ کا مقصد تھا کہ غاصب صیہونی فوج کی طاقت کو تقسیم کرے اور غزہ پر جاری جارحیت کی شدت کو کم کیا جائے۔

حالیہ دنوں کے واقعات کے بعد ایسا لگ رہا ہے کہ غاصب صیہونی فوج حزب اللہ کے بچھائے ہوئے جال میں بری طرح پھنس چکی ہے۔ پوری ایک بریگیڈ جنوبی لبنان کی سرحد پر لگائی جا چکی ہے۔ لبنان کے علاقوں پر بمباری کی جا رہی ہے۔ حزب اللہ کے کمانڈروں کو ٹارگٹ کلنگ کا نشانہ بنایا جا رہا ہے۔ ہر وہ حربہ جو غاصب صیہونی حکومت اسرائیل آزما سکتی ہے، آزما رہی ہے اور لبنان سمیت حزب اللہ پر دبائو بڑھانے کی کوشش کر رہی ہے، تاکہ حزب اللہ کو جنوبی لبنان سے شمال فلسطین میں کارروائیوں سے رو ک سکے۔ حزب اللہ کی کارروائیوں کے نتیجہ میں شمال فلسطین کے لاکھوں صیہونی آبادکار بے گھر ہوچکے ہیں، جن کو دوبارہ واپس لا کر آباد کرنا بھی غاصب صیہونی حکومت اسرائیل اور اس کی صیہونی دہشت گرد فوج کے لئے ایک بڑا چیلنج بن چکا ہے اور تمام تر کوشش کے باوجود وہ ایک بھی صیہونی آبادکار کو واپس لا کر آباد کرنے میں کامیاب نہیں ہوئے ہیں۔

حالیہ دنوں میں حزب اللہ اور لبنانی شہریوں کے خلاف اسرائیلی غاصب دشمن کے حملوں میں تیزی پیجر حملوں کے بعد حزب اللہ کمانڈر ابراہیم عقیل کی شہادت اور پھر بیروت و جنوبی لبنان میں شہری آبادیوں پر بڑے پیمانے پر بمباری ہے۔ لیکن ان سارے واقعات میں اگر دیکھا جائے تو غاصب صیہونی فوج اور دشمن نہ تو لبنان کے لوگوں کے حوصلے کو پست کرسکا ہے اور نہ ہی حزب اللہ کے خلاف کوئی بڑی کامیابی حاصل کرسکا ہے، ماسوائے قتل و غارت گری کے۔ دوسری جانب حزب اللہ ہے کہ جس نے پیجر حملوں اور ابراہیم عقیل کی شہادت کے بعد کسی قسم کے دبائو کو قبول نہیں کیا اور اگلے ہی دن مقبوضہ فلسطین کے علاقے حیفہ کو اپنے درجنوں میزائلوں سے نشانہ بنایا۔ ان کارروائیوں میں حزب اللہ نے رامات ڈیوڈ فوجی ہوائی اڈے کو نشانہ بنایا اور ساتھ ساتھ حیفہ میں موجود ملٹری ٹیکنالوجی ساز و سامان بنانے والی ایک بہت بڑی فیکٹری کو میزائلوں کا نشانہ بنا کر مکمل طور پر تباہ کر دیا۔

حزب اللہ کی ان کاروائیوں کے بعد پورے مقبوضہ فلسطین میں غاصب صیہونی حکومت کے عہدیداروں پر سوگ طاری ہوگیا، یہاں تک کہ تمام بڑے صیہونی سوشل میڈیا اکائونٹس نے جھوٹی اور من گھڑت خبریں پھیلانے کی بہت کوشش کی، لیکن حزب اللہ کے حملوں کے نتیجہ میں ہونے والے نقصانات کی ویڈیوز نے منظر عام پر آکر غاصب صیہونی حکومت اسرائیل کے تمام تر بھرم کو خاک میں ملا کر رکھ دیا۔ حیفا جلتا رہا، کوئی بچانے والا نہیں تھا۔ غاصب اسرائیل کا نام نہاد آئرن ڈوم بری طرح ناکام ہوگیا۔ میزائل روکنے کے لئے فائر کئے گئے میزائل خالی گھروں میں جا گرے کہ جہاں سے پہلے ہی صیہونی آبادکار گھر چھوڑ کر فرار کرچکے تھے۔

یہاں سب سے اہم بات یہ ہے کہ تمام تر مشکل حالات اور قربانیوں کے باوجود حزب اللہ کی پالیسی میں کس قسم کی کوئی لچک یا گھبراہٹ دیکھنے کو نہیں ملی ہے، بلکہ کمانڈروں کے شہادت سے حزب اللہ کے جوانوں کے حوصلے مزید مستحکم ہوئے ہیں۔ ان سب باتوں سے اہم بات یہ ہے کہ حزب اللہ نے اپنی صلاحیت دکھا دی ہے کہ وہ مقبوضہ فلسطین کے اندر ساٹھ کلو میٹر تک حملہ کرکے دشمن کے فوجی ہوائی اڈوں کو ناکارہ کرسکتی ہے۔ لبنان پر اسرائیلی فوج کی بمباری کے نتیجے میں چار سو سے زیادہ لوگ شہید ہوئے اور دو ہزار کے قریب زخمی ہوئے، لیکن اگلے ہی روز حزب اللہ نے شمال فلسطین سمیت ایلات اور تل ابیب تک یعنی اب ساٹھ کلو میٹر سے آگے بڑھ کر ایک سو بیس کلو میٹر کے فاصلہ پر صیہونی فوج کے اہداف کو نشانہ بنایا اور نقصان پہنچایا۔

یہ ایسی کامیابیاں ہیں کہ جنہوں نے پوری دنیا کے سامنے غاصب اسرائیل اور اس کے ہمنوائوں امریکہ اور برطانیہ سمیت یورپی حکومتوں کو ذلیل و رسوا کرکے رکھ دیا ہے۔ منگل کے روز ہونے والی کارروائیوں میں چھ بڑے آپریشن انجام دیئے گئے، جس کے بعد پورے مقبوضہ علاقوں میں خطرے کے سائرن بجتے رہے اور غاصب اسرائیلی حکومت نے ایمرجنسی کا اعلان کیا۔ خلاصہ یہ ہے کہ غاصب اسرائیل ایک کے بعد ایک دہشت گردانہ کارروائی کے بعد مسلسل شکست کے دہانے پر پہنچتا چلا جا رہا ہے اور حزب اللہ کی کارروائیوں میں کمی آنے کی بجائے مزید اضافہ ہونا اس بات کی دلیل ہے کہ حزب اللہ کے بارے میں غاصب اسرائیلی دشمن کے دعوے اور حساب کتاب مکمل طور پر غلط ثابت ہوا ہے اور اسرائیل پہلے غزہ میں ناکام ہوا اور اب مسلسل لبنان میں ناکامی کا سامنا ہے۔