اسلام ٹائمز - بیجنگ ڈیکلریشن امید کی کرن

اسلام ٹائمز: بلاشبہ، بیجنگ کا یہ اعلان 2007ء کے بعد جب سے فلسطین کے آخری عام انتخابات منعقد ہوئے تھے، غزہ اور مغربی کنارے کے درمیان فلسطین میں سیاسی تقسیم کے ہنگامہ خیز دور کے خاتمے کے عمل میں ایک اہم موڑ ہے۔ یہ مسئلہ زیادہ تر فلسطینی گروہوں کی اس مشترکہ سازش کے بارے میں آگاہی کی وجہ سے ہے، جو صہیونیوں نے مغربی ممالک اور خطے کے بعض عربوں کے تعاون سے جنگ کے بعد غزہ اور پھر مغربی کنارے کے لیے منصوبہ بندی کی ہے۔ اس منصوبے کے تحت غزہ اور مغربی کنارے کو ایک نئے نظام کے تحت فلسطینیوں کے ہاتھ سے لینا ہے۔

تحریر: ڈاکٹر راشد عباس نقوی

چین نے مسئلہ فلسطین کے حل میں دلچسپی اور فلسطینی تنظیموں کو متحد کرنے کے لئے جو قدم اٹھایا ہے، اس نے وائٹ ہاوس اور صیہونی لابی کو ایک نئے چیلنج سے دوچار کر دیا ہے۔ چینی وزیر خارجہ کی تصدیق اور چینی سرکاری میڈیا کے مطابق، دو دن تک جاری رہنے والی گفت و شنید کے بعد، 14 فلسطینی دھڑوں نے گزشتہ ہفتے منگل کی صبح بیجنگ میں ایک سمجھوتہ پر اتفاق کیا، جس کے مطابق اختلافات اور باہمی تقسیم کے خاتمے اور غزہ پر حکومت کرنے کے لیے "قومی مفاہمت کی عبوری حکومت" تشکیل دی جائے گی۔ اس معاہدے میں، جسے "بیجنگ ڈیکلریشن" کہا جا رہا ہے، یہ شرط رکھی گئی ہے کہ قومی مفاہمت کی عبوری حکومت لبریشن آرگنائزیشن کے فریم ورک کے اندر قائم کی جائے گی اور پھر فلسطینی علاقوں میں انتخابات کے انعقاد کے لیے راستہ ہموار کیا جائے گا۔

اسلامی مزاحمتی تحریک (حماس) کی مذاکراتی ٹیم کے سربراہ موسیٰ ابو مرزوق نے چین میں منعقدہ اجلاس میں اعلان کیا کہ اس تحریک نے الفتح اور دیگر فلسطینی دھڑوں کے ساتھ "قومی اتحاد" کے معاہدے پر دستخط کیے ہیں۔ ابو مرزوق نے کہا: "آج ہم قومی اتحاد کے معاہدے پر دستخط کر رہے ہیں۔ ہم کہتے ہیں کہ اس سفر کو مکمل کرنے کا راستہ قومی اتحاد ہے۔ ہم قومی اتحاد پر قائم ہیں اور ہم اسے چاہتے ہیں۔" بیان کے متن میں کہا گیا ہے کہ زیر بحث حکومت فلسطینی علاقوں میں تمام اداروں کو متحد کرے گی اور غزہ کی پٹی کی تعمیر نو کا آغاز کرے گی اور اس کے ساتھ ساتھ، فلسطینی مرکزی الیکشن کمیشن کی نگرانی میں عام انتخابات کے انعقاد کے لیے میدان تیار کرے گی۔"

اس اعلامیے میں تمام فریقین نے فلسطینی اتحاد کی مضبوطی پر زور دیتے ہوئے اقوام متحدہ کی قراردادوں (181 اور 2334) کے مطابق قدس شھر کو اس کا دارالحکومت بنانے اور قرارداد 194 کی بنیاد پر مہاجرین کی واپسی کے حق کی ضمانت کے ساتھ ایک آزاد فلسطینی ریاست کے قیام کے ہدف تک پہنچنے کے لیے تجدید عہد کا اعلان کیا۔ بیان کے مطابق فلسطینی گروپوں نے "جنرل سیکریٹریز کے اجلاس کو قومی کونسل کی تشکیل کے کام کا نقطہ آغاز قرار دیا اور اس بیان پر عمل درآمد کے لیے ایک ٹائم ٹیبل طے کرنے کا بھی فیصلہ کیا۔" تمام دھڑوں نے اپنے بیانات میں کہا ہے کہ 4 مئی 2011ء کو فلسطین کا قومی معاہدہ قومی وحدت حکومت کے اقدامات کی بنیاد ہے۔

واضح رہے کہ فلسطینی دھڑوں کے جنرل سیکریٹریز نے گزشتہ چند سالوں میں دو ملاقاتیں کی ہیں، پہلا اجلاس 3 ستمبر 2020ء کو لبنان کے دارالحکومت بیروت میں اور دوسرا اجلاس 3 ستمبر 2020ء کو مصر کے شہر العالمین میں ہوا۔ یہ ملاقاتیں عام طور پر پچھلے سالوں میں طے پانے والے معاہدوں کی پیروی کے لیے ہوتی رہی ہیں، جن میں معاہدہ قاہرہ (4 مئی 2011ء) اور الجزائر کا اعلامیہ (12 اکتوبر 2022ء) شامل ہے۔ تاہم 7 اکتوبر سے غزہ کی پٹی پر مغرب کی حمایت سے جنگ کے آغاز اور صیہونی حکومت کے وحشیانہ حملے نے مذاکرات کی دعوت کو دوبارہ زندہ کردیا۔ سب سے پہلے، گزشتہ اپریل میں، حماس اور الفتح تحریکوں نے پہلی بار بیجنگ میں ملاقات کی تھی، جس میں 17 سالہ تنازعے کے خاتمے اور فلسطینی قومی اتحاد کی حکومت کی تشکیل کے لیے مصالحتی کوششوں پر تبادلہ خیال کیا گیا تھا۔

یہ مذاکرات بالآخر حالیہ بیجنگ اجلاس کے دوسرے دور میں ایک مشترکہ بیان جاری کرنے پر منتج ہوئے، جس کا نتیجہ یہ نکلا کہ تمام فلسطینی گروپوں نے فلسطین لبریشن آرگنائزیشن کو فلسطین کی آزادی کی واحد نمائندہ کے طور پر قبول کرنے پر اتفاق کیا۔ یہ تنظیم فلسطینی عوام کو بین الاقوامی میدان میں اور قومی مفاہمت کی عارضی حکومت کی تشکیل کے لیے انتخابات کے انعقاد کے لیے پلیٹ فارم مہیا کرے گی۔ ان دو ملاقاتوں میں فتح، حماس اور اسلامی جہاد کے تین نمایاں گروپوں کے علاوہ دیگر شرکاء بھی موجود تھے، جن میں پاپولر فرنٹ فار دی لبریشن آف فلسطین، ڈیموکریٹک فرنٹ فار لبریشن آف فلسطین، ڈیموکریٹک فرنٹ فار لبریشن آف فلسطین۔ پیپلز پارٹی، فلسطینی عوامی جدوجہد فرنٹ اور نیشنل انیشی ایٹو موومنٹ، پاپولر فرنٹ کی جنرل کمانڈ، فلسطینی ڈیموکریٹک یونین (ایف ڈی اے)، فلسطین لبریشن فرنٹ، عرب لبریشن فرنٹ، فلسطینی عرب گارڈز اور وان۔ پاپولر لبریشن وار شامل ہیں۔

بلاشبہ، بیجنگ کا یہ اعلان 2007ء کے بعد جب سے فلسطین کے آخری عام انتخابات منعقد ہوئے تھے، غزہ اور مغربی کنارے کے درمیان فلسطین میں سیاسی تقسیم کے ہنگامہ خیز دور کے خاتمے کے عمل میں ایک اہم موڑ ہے۔ یہ مسئلہ زیادہ تر فلسطینی گروہوں کی اس مشترکہ سازش کے بارے میں آگاہی کی وجہ سے ہے، جو صہیونیوں نے مغربی ممالک اور خطے کے بعض عربوں کے تعاون سے جنگ کے بعد غزہ اور پھر مغربی کنارے کے لیے منصوبہ بندی کی ہے۔ اس منصوبے کے تحت غزہ اور مغربی کنارے کو ایک نئے نظام کے تحت فلسطینیوں کے ہاتھ سے لینا ہے۔ 7 اکتوبر کی عظیم شکست اور مقبوضہ علاقوں کے لیے اس کے ناقابل تلافی نتائج نے صیہونیوں کے لیے ایک خطرناک صورت حال پیدا کر دی ہے۔ اگر وہ جنگ میں کامیابی حاصل نہیں کرسکتے (جو کہ وہ غزہ کے عوام کی شدید مزاحمت کی وجہ سے اب تک حاصل نہیں کرسکے) تو انہیں ایک طویل انتشار کا سامنا رہے گا۔

امریکی اور صیہونی حکمت عملی کے ماہرین اس حقیقت سے واقف ہیں کہ فلسطین اور خطے میں طاقت کے توازن میں تبدیلی کی وجہ سے صیہونی حکومت کی حمایت کرنے والی سیاسی، سکیورٹی، فوجی اور اقتصادی بنیادیں زیادہ دیر تک ان مسائل اور سنگین چوٹوں کا وزن برداشت نہیں کر سکیں گی۔اسرائیل کے وزیراعظم بنجمن نیتن یاہو کے بیان کا صحیح ترجمہ، جن کا کہنا ہے کہ ان کا مقصد "حماس تحریک کو تباہ کرنا" ہے اور جنگ کے بعد غزہ کے انتظام میں اس گروپ کے کسی بھی کردار کی مخالفت کرتا ہے۔ اس لیے جنگ کے بعد غزہ پر حکومت کرنے کے لیے مخلوط حکومت کی تشکیل کی تجویز کی منظوری کے ساتھ ساتھ تمام فلسطینی گروہوں کی جدوجہد اور مزاحمت کے جواز پر منظوری کی مہر ثبت کرنا اور فلسطینیوں کو ان کی سرزمین سے بے گھر کرنے کی کسی بھی کوشش کی متفقہ طور پر مذمت کرنا ظاہر کرتا ہے کہ فلسطینی گروہ سیاسی پیش رفت کی پیچیدگی سے آگاہ ہیں۔

اسی مناسبت سے حماس کے سیاسی دفتر کے ارکان میں سے ایک حسام بدران نے ایک بیان میں مذاکرات کی میزبانی کرنے اور اس طرح کے ڈیکلریشن تک پہنچنے کے لیے چین کی بھرپور کوششوں پر شکریہ ادا کرتے ہوئے تاکید کی ہے کہ "یہ اعلامیہ ایک اہم وقت پر شائع کیا گیا ہے، کیونکہ ہمارے لوگ جنگ اور تباہی کا شکار ہیں، خاص طور پر جو غزہ کی پٹی میں واقع ہیں۔ انہوں نے کہا: "بیجنگ کا اعلان فلسطینی قومی اتحاد کے حصول کی جانب ایک اہم مثبت قدم ہے۔" بدران نے کہا: فلسطینی قومی مفاہمتی حکومت کی تشکیل کے معاہدے کا سب سے اہم ہدف اور محور، غزہ اور مغربی کنارے میں ہمارے لوگوں کے معاملات کا انتظام، تعمیر نو کی نگرانی اور انتخابات کے لیے حالات کی تیاری ہے۔ انہوں نے تاکید کی ہے کہ یہ تمام علاقائی اور بین الاقوامی مداخلتوں کے خلاف ایک ناقابل تسخیر رکاوٹ ہے، جو جنگ کے بعد مسئلہ فلسطین کے انتظام میں ہمارے عوام کے مفادات کے خلاف شرائط عائد کرنا چاہتے ہیں۔