Islam Times - Gürcüstan küçələrində İmam Hüseynin şəhadətilə bağlı başsağlığı mesajı

Gürcüstan küçələrində İmam Hüseynin şəhadətilə bağlı başsağlığı mesajı

İslamtimes - Gürcüstanın Marneulinin mərkəzi küçələrində meriaya aid stendlərdə İmam Hüseynin (ə) şəhadətilə bağlı başsağlığı mesajı yayımlanıb.

Bunu saytımıza Gürcüstan Müsəlmanları İdarəsinin şeyxi Hacı Ramin İgidov bildirib.
Az.shafaqna.com–a açıqlamasında Hacı Ramin İgidov qeyd edib ki, Gürcüstanda Dini Məsələlər üzrə Dövlət Agentliyi qurularkən Gürcüstan Müsəlmanları İdarəsi onların vasitəsilə dövlətin dini təqvimində müəyyən İslama aid dini bayramların qeyd olunmasına çalışıb.
“Əvvəlcə Qurban bayramı və Ramazan bayramı təqvimə salındı. Sonra bir çox bayramlar xüsusilə Peyğəmbərimizin, İmam Əli, Fatimeyi Zəhra, İmam Hüseynin, Həzrət Mehdinin doğum günləri, eyni zamanda Məbəs və Qədir Xum bayramları da təqvimə salındı.Bundan sonra məhərrəmliklə bağlı müraciət etdik. Məhərrəmlik də yas olaraq qeyd olundu.”, – deyə Gürcüstan Müsəlmanları İdarəsinin şeyxi Hacı Ramin İgidov qeyd edib.
Din xadiminin bildirdiyinə görə, bundan əvvəl dini bayram münasibətilə bir neçə dəfə bu cür stendlər Marneuli, Qardabani, Acaranın bir neçə şəhərində mərkəzi küçələrdə yerləşdirilib.