Islam Times - Aksiyada səslənən tərbiyəsiz şüarlara reaksiya

İslamtimes - DEVAMM sədri, ilahiyyatçı-filosof Hacı İlqar İbrahimoğlu 8 martda yer alan aksiyada səslənən bəzi əxlaqa zidd şüarlarla bağlı bəyanat vermişdir.

Bəyanatda deyilir:

“Bağışalayan və Mehriban Allahın adı ilə!

Əslində keçən gündə Bakımızda bir bəla baş verib. İctimai bir bəla.
Bütün koronaviruslardan dəhşətli olan bəla.

Biriləri əllərində tərbiyəsiz şüarlar tutmuşdular. Ali amallar kölgəsində, əslində mənəviyyata və əxlaqa zidd mövqe sərgiləyiblər.

Əcəba, anlayışların zorla əvəzlənməsinin, dəyərlərin erroziyasının bu cür bayağı təzahürlərimidir azadlıq?!
Bəşəriyyət min illər ərzində azadlıq uğrunda, ləyaqət uğrunda ən layiqli oğul və qızlarını qurban verib. Amma həqiqi azadlıq uğrunda!

Allah insanı hürr yaradıb. İnsanın hürriyyəti ləyaqət üzərindədir. İnsanın ləyaqəti – Uca Allahdan verilmiş bir böyük nemətddir. “Biz, Adəm övladını izzətli və dəyərli elədik” (“İsra”, 70)
İmam Əli (ə) buyurub: "Başqalarına qul olma, Allah Təala səni hürr və azad yaradıb".

Amma dünənki aksiyada səslənən o rəzil şüarlar – nə azadlıqla, nə də ləyaqətlə bir araya sığmır. Məhz belə şüarlar – ilk növbədə qadın azadlığına, hürriyyətə və qadın ləyaqətinə ziddir. Ümumiyyətlə, insan ləyaqəti vahiddir. Bu cür təzahürlər ümumilikdə insan ləyaqətinə ziddir.

Baş vermiş rəzalət əxlaqi-mənəvi dəyərləri tapdalamaqla yanaşı, ümumilikdə ictimai əxlaqla ziddiyyət təşkil edir.

Əksər hallarda bu tip ictimai əxlaqa zidd şüarları səsləndirənlərin çoxu, epataj və provokasiya yolu ilə həqiqi problemlərə diqqət çəkmək niyyəti ilə aldanaraq, özləri də bilmədən oturduqları budağı mişarlayır, cəmiyyətin təməl matrisasını və varolma kodunu zədələyirlər.

Təəssüf ki, konservatizm və arxailikdə suçlanmaq qorxusu, “qadın azadlığına” qarşı çıxmaqda ittiham olunmaq xofu – çoxları üçün daxili senzura rolunu oynayır. Amma məhz prinsipial ictimai qınaq bu cür ictimai aşınmalardan qoruya bilər.
Düşünürəm ki, cəmiyyətimizin hər bir sağlam üzvü, bu tip Overton pəncərəsi rolunu oynaya biləcək olaya birmənalı və aydın mənfi münasibətini ortaya qoymalıdır.

Günümüzün bu kimi fitnə və fəsadlarından Uca Rəbbimizə sığınıram.
Uca Allah Vətənimizi bu kimi eybəcərliklərdən və rəzilətlərdən qorusun, toplumun hər bir üzvünə, o cümlədən, aldanaraq bu növ psixoloji deformasiyalara qol qoyan balalara da bəsirət və hidayət nəsib etsin!”.