‘Humanistlər’ 6 yaşlı körpənin qətlinə niyə susur?

Bir müddət əvvəl sosial şəbəkələrdə video yayılmışdı. Görüntülərdə gənc bir oğlan doğum evindən çıxan həyat yoldaşı və körpəsinin ayaqları altında qoyun qurban kəsmişdi. Bu görüntülər o qədər rezonans doğurdu ki, heyvan haqlarını müdafiə edən təşkilatlar məsələni hüquqi müstəviyə qaldırdılar. Həmin gənci polis həbs etdi və sonra çıxıb etdiyi əmələ görə üzr istədi. Hətta cəzalandırıldı. Cəmiyyət içərisində qoyun başı kəsmişdi...

 

Qoyunun mahiyyəti qurban kəsilmək üçündür. Çünki Allah qoyunu bunun üçün yaradıb. Əgər onu qatar vurub öldürsə, ona “murdar oldu” deyilir. Amma Allah buyurduğu kimi hər hansı bir münasibətə  görə kəsiləndə isə “qurban kəsildi, Allah qəbul etsin” kimi ifadələr işlədilir.

 

Sözümüz bu deyil. Cəmiyyətdə bir qoyun üçün əslində “xoşbəxtlik” hesab edilə biləcək addıma görə bu qədər qınaq oldu. Hamı o gənci qınadı, bir o qaldı ki, onu terrorçu adlandırsınlar. Amma...

 

Bir neçə gün əvvəl, təxminən eyni ərəfədə Səudiyyə Ərəbistanında vəhhabi və təkfirçi zehniyyətli bir taksi sürücüsü Peyğəmbərə (s) salam və salavat deyən bir ananı “cəzalandırmaq” üçün onun azyaşlı oğlu Zəkəriyyanın başını küçənin ortasında kəsdi. Maraqlıdır ki, ətrafdakı insanlar belə bu mənzərəyə reaksiya vermədilər. Çünki həmin təkfirçi düşüncə sahibi ətrafdakılara bir sözü deyirdi. “Bu şiədir, kafirdir!” Hökumət də taksi sürücüsünü “devet B” adlandırıb cəzalandırmaqdan imtina etdi.

 

Dəhşətlisi bu da deyil. Dəhşətli olan insanlığın bu məsələyə olan münasibətidir. Körpə bir uşağın başının kəsilməsinə verilən reaksiya bir qoyun qədər də olmadı. 

 

Beynəlxalq insan haqları təşkilatları bu qorxunc cinayətin qarşısında qeyri-şəffaf davrandı və bu hadisəni pisləyən bəyanatla çıxış belə etmədilər.  

 

Necə ki, Yəməndə, Fələstində tökülən qanlara, öldürülən körpələrə, fəryadlara münasibət bildirmir, görməməzlikdən gəlirlər, eynilə bu başı kəsilən məzlum körpənin anasının fəryadına da bu cür yanaşırlar.

 

İnsan həqiqətdən uzaqlaşdıqca, həqiqətə olan biganəlik ona yol tapır. Çünki artıq onun zehni haqqa tərəf deyil, qoyuna tərəf yönəlib. Bu cür zombiləşdirmə nəticəsində bir itin ayağının sınması ilə ağlayan birini gözünün qarşısında kəsilən uşaq başı ağlatmır. Çünki onun beyin bazasında bu hissəyə bir parol qoyulub. Ya da, “təhlükəli virus” kimi görərək ondan qaçır.

 

Təbii ki, bu hadisə Avropalı bir uşağın başına gəlsəydi, indi bütün dünya çalxalanardı. Buna nümunə olaraq, bir nəfərin öldürülməsi ilə qol-qola girərək nümayiş keçirən dünya prezidentlərini göstərmək olar. Amma nədənsə hər gün başı kəsilən müsəlman körpələr onların vicdanını zərrəcə sızlatmır.  Çünki o vicdan artıq yoxdur. Onun sızlayan hissəsi yalnız qurban kəsilən qoyun üçündür. Qurban edilən Zəkəriyya üçün yox...